कोहलपुर, भदौ १६,
कोहलपुर नगरपालिका–११ मा सञ्चालित कौशिल्या अस्पतालले स्वास्थ्य सेवा मात्रै नभई सामाजिक उत्तरदायित्वका कामहरूलाई पनि निरन्तरता दिँदै आएको छ ।
निःशुल्क सेफ्टी ज्याकेट वितरण, बिरामीलाई छुटसहितको स्वास्थ्य कार्ड वितरण, विपन्न वर्गका बिरामीलाई औषधि र उपचारमा सहुलियत उपलब्ध गराउनेजस्ता कार्यलाई प्राथमिकतामा राखेको छ । अस्पतालले विद्यालयमै पुगेर निःशुल्क स्वास्थ्य शिविर सञ्चालन गर्ने, विद्यार्थीलाई दन्त परीक्षण, दृष्टि परीक्षण, पोषणसम्बन्धी परामर्श दिने, रक्तदान तथा स्वास्थ्य सचेतनामूलक कार्यक्रम गर्ने, समुदायस्तरमा निःशुल्क स्वास्थ्य परामर्श र जाँच शिविर आयोजना गर्ने कामलाई निरन्तरता दिदैं आएको छ । यी कार्यक्रमहरूले समाजमा स्वास्थ्य सचेतना बढाउनुका साथै सुलभ स्वास्थ्य पहुँच सुनिश्चित गर्न सहयोग पुगेको अस्पतालले जनाएको छ ।
यही क्रममा अस्पतालले श्रमिकको सम्मान, दुर्घटनामा कमी ल्याउने उद्देश्य र ट्राफिक नियमको पालना बढाउन भन्दै ६१ जना अटोचालकलाई सेफ्टी ज्याकेट वितरण गरेको थियो । अस्पतालका निर्देशक रामप्रसाद न्यौपानेका अनुसार दुर्घटनामा कमी ल्याउन सचेतना कार्यक्रमसँगै प्रत्यक्ष सहयोगका कार्यक्रमलाई पनि अस्पतालले प्राथमिकतामा राखेको छ । उनले भने,–‘स्वास्थ्य सेवा दिनु हाम्रो पहिलो दायित्व हो तर समाजप्रति उत्तरदायी बन्नु त्यत्तिकै जरुरी छ । अटोचालकहरू दिनरात मेहनत गर्ने श्रमिक वर्ग हुन् । उनीहरूको सुरक्षासँगै स्वास्थ्य पहुँचमा सहजता ल्याउनु नै हाम्रो उद्देश्य हो ।’
यसैगरी, अस्पतालले चालक तथा उनीहरूको परिवारलाई सहज स्वास्थ्य सेवा पाउन सक्ने गरी विशेष कार्ड वितरण गरेको छ । उक्त लिएका परिवारले अस्पतालमार्फत उपचार गर्दा औषधि र सेवा शुल्कमा २५ प्रतिशत छुट पाउने व्यवस्था गरिएको छ । कोहलपुर यातायात सेवा प्रा.ली.मार्फत सञ्चालन हुने अटोचालकलाई यस कार्यक्रमबाट लाभ हुने यातायात सेवा प्रा.ली.का अध्यक्ष नन्दप्रसाद पौडेलले बताए । उनले भने,–‘अस्पतालले चालकहरूको स्वास्थ्य र सुरक्षालाई ध्यानमा राख्दै दिएको यो सहयोग वास्तवमै प्रशंसनीय छ ।’ गत आर्थिक वर्षमा मात्रै अस्पतालले विभिन्न समुदायका बिरामीलाई करिब दुई लाख बाउन्न हजार रुपैयाँ बराबरको छुट दिएको अस्पतालले जनाएको छ ।
समुदायमै पुग्ने लक्ष्यअनुसार अस्पतालले विभिन्न विद्यालयमा समेत निःशुल्क स्वास्थ्य शिविर र स्वास्थ्य परामर्श कार्यक्रम सञ्चालन गर्दै आएको छ । विद्यार्थीहरूको दृष्टि परीक्षण, दन्त परीक्षण, सामान्य स्वास्थ्य जाँच, पोषण सम्बन्धी परामर्शजस्ता सेवा विद्यालयमै पुगेर उपलब्ध गराइएको अस्पतालले जनाएको छ । यसबाट विद्यार्थी, शिक्षक र अभिभावक सबै लाभान्वित भएका छन् । अस्पतालले स्वास्थ्य उपचारलाई सहज र किफायती बनाउन विशेष छुट, स्वास्थ्य कार्ड, समुदायमै पुग्ने स्वास्थ्य शिविर तथा विद्यालयस्तरका स्वास्थ्य परामर्श कार्यक्रमलाई निरन्तरता दिदैं आएको छ ।
निर्देशक न्यौपानेका अनुसार आगामी दिनमा समेत कौशिल्या अस्पतालले सुलभ, सहज र गुणस्तरीय स्वास्थ्य सेवा विस्तार गर्नासाथ सामाजिक उत्तरदायित्वअन्तर्गतका कार्यक्रमलाई अझ व्यापक बनाउने लक्ष्य लिएको छ । यस्ता गतिविधिले अस्पताललाई मात्र नभई स्थानीय समुदायलाई पनि प्रत्यक्ष लाभ पुगेको छ । कौशिल्या अस्पतालले कोहलपुर र आसपासका समुदायलाई लक्षित गर्दै सामान्य उपचारदेखि विशेषज्ञ सेवा उपलब्ध गराउँदै आएको छ ।
आकस्मिक सेवा, महिला तथा प्रसूति सेवा, बालबालिका र सामान्य रोग उपचार, दन्त सेवा, फिजियोथेरापी, अर्थाेपेडिक सेवा, ल्याब परीक्षण तथा एक्स–रे, मुटुको एक्स–रे (ECHO), डिजिटल एक्स–रे, मिडियो एक्स–रे (USG / अल्ट्रासाउन्ड), कलर डप्लर (Color Doppler), स्वास्थ्य परामर्श र नियमित स्वास्थ्य शिविर, विद्यालयमा स्वास्थ्य शिविर र परामर्श लगायतका विभिन्न सेवाहरु अस्पतालले दिदैं आएको छ
