कोहलपुर, असोज २६,
मित्रराष्ट्र संयुक्त अधिराज्य बेलायतको वेल्स, क्रेकनमा सम्पन्न ‘Exercise Cambrian Patrol 2025’ मा नेपाली सेनाको टोलीले उत्कृष्ट प्रदर्शन गर्दै स्वर्ण पदक प्राप्त गरेको छ ।
बेलायतमा असोज २३ गतेदेखि २५ गतेसम्म सञ्चालन भएको उक्त अभ्यासमा संयुक्त अधिराज्य बेलायतसहित ३३ राष्ट्रका १७५ टोलीले सहभागिता जनाएका थिए । सन् १९६० देखि नियमित रूपमा हुँदै आएको यो अन्तर्राष्ट्रिय स्तरको सैनिक अभ्यासमा नेपाली सेना सन् २०१५ देखि सहभागी हुँदै आएको हो । अभ्यासका क्रममा सहभागी टोलीहरूले करिब ७० पाउण्ड तौल बराबरको हतियार र उपकरण सहित ६० किलोमिटर दूरी पैदल पार गर्दै विभिन्न कठिन कार्यहरू तयारी, खबर संकलन, घाइते उद्धार, र विषम परिस्थितिमा युद्ध कौशल प्रदर्शन गरेका थिए ।
यसअघि पनि नेपाली सेनाले सोही प्रतियोगितामा सन् २०१५, २०१९ र २०२४ मा समेत स्वर्ण पदक जितिसकेको छ । यस वर्षको स्वर्ण पदकले नेपाली सेनाको अन्तर्राष्ट्रिय स्तरमा उत्कृष्टता र शौर्यको पुनः प्रमाण दिएको छ ।
