प्रत्येक परिवार एक सदस्यको कोरोना पीसीआर परीक्षण गर्न माग

महोत्तरी । प्रदेश २ का प्रदेश सभा सांसद मंजु कुमारी यादवले पीसीआर परीक्षणको दायरा बढाउन प्रदेश सरकारसंग माग गर्नुभएको छ ।

विश्वव्यापी रुपमा फैलिएको  करोना भाइरस संक्रमण रोकथाम तथा नियन्त्रणका लागि विकास निर्माण भन्दा पनि पहिला पीसीआर परीक्षणको दायरा बढाउनु पर्ने आवश्यकता रहेको जनाउनु भएको छ ।

प्रदेश २ का समुदायमा फैलिएको कोरोना महामारीबाट जनतालाई तत्काल विकास निर्माणको कार्य स्थगित, गरी प्रत्येक  परिवार एक सदस्यको पीसीआर चेकजाँचको व्यवस्था गर्नुपर्ने प्रदेश सरकारसँग माग गर्नु भएको हो  । विकास निर्माणको काम पछि पनि गर्न सक्ने तर कोरोना महामारीको संकटबाट आम जनतालाई पछि बचाउन नसक्ने जनाउँदै उहाँले प्रदेश सरकारलाई प्रत्येक परिवार एक सदस्यको कोरोना पीसीआर चेकजाँचको व्यवस्था तत्काल गर्नुपर्नेमा सुझाब दिनुभयो ।

कोरोना संक्रमितको संख्या बढ्दै गएपछि भेन्टिलेटर खरिदका लागि रकम समेत निकासा हुन नसकेको प्रदेश सरकारमाथि आरोप लगाउदै उहाँले पीसीआर चेकजाँचको दायरा बढाउन गुणस्तरीय पीसीआर मेशिनको संख्या समेत बढाउनुका साथै उचित उपचार र आइसोलेशन तथा भेन्टिलेटरको व्यवस्था गर्न समेत माग गर्नुभएको छ ।

सांसद यादबले कोरोना रोकथाम एवं नियन्त्रणका लागि अग्रपंक्तिमा खटिरहेका स्वास्थ्यकर्मी, संचारकर्मी, सुरक्षाकर्मीको मनोबल बढाउन पीपीई सेट सहितका सुरक्षा सामाग्री र जोखिम भत्ताको व्यवस्था समेत गर्न माग गर्दै प्रदेश सरकारलाई कोरोना रोकथामका लागि सक्रिय हुन आग्रह गर्नुभएको छ ।

प्रदेश २ को धनुषामा साेमबार राति एकजना ६० वर्षीय संक्रमितको उपचारको क्रममा प्रादेशिक अस्पताल जनकपुरमा मृत्यु भएको छ । ती संक्रमितसंगै यस प्रदेशमा कोरोनाबाट मृत्यु हुनेको संख्या ३० पुगेको छ ।