थप ९ जना कोरोना संक्रमितको मृत्यु,ज्यान गुमाउनेको संख्या १४६ पुग्यो

काठमाडौं ।   पछिल्लो २४ घण्टामा थप ९ जना कोरोना संक्रमितको मृत्यु भएको छ ।  

शनिबारको प्रेस ब्रिफिङमा स्वास्थ्य तथा जनसंख्या मन्त्रालयका प्रवक्ता डा जागेश्वर गौतमले कोरोनाभाइरस संक्रमणबाट थप ९ जनाको मृत्यु भएको जानकारी दिएका हुन् । यो संगै आज शनिबारसम्म मृत्यु हुनेको कुल संख्या १४६ पुगेको छ ।

सुनसरीका २ जना, पर्साका ३ जना, बाराका १ जना, सिरहाका १ जना र मकवानपुरका १ र भक्तपुरका १ जना गरी ९ जनाको मृत्यु भएको हो । योसँगै कोरोना संक्रमणका कारण ज्यान गुमाउनेको संख्या १४६ पुगेको हो । 

यस्तै पछिल्लो २४ घण्टामा काठमाडौं उपत्यकामा थप  २१६ सहित देशभर ६३४ जना  संक्रमित थपिएका छन् ।

 डा  गौतमले काठमाडौं उपत्यकामा थप २१६ जनामा कोरोना संक्रमण पुष्टि भएको छ । जसमा काठमाडौंमा १६०, ललितपुरमा ६ र भक्तपुरमा ५० जना रहेको जानकारी दिए । यो संगै कोरोना संक्रमितको कुल  संख्या ३१ हजार १ सय १७ पुगेको उनले जानकारी दिए ।

डा. गौतमका अनुसार हालसम्म  सक्रिय संक्रमितको संख्या १२ हजार ६२१ जना रहेका छन् ।

यस्तै  पछिल्लो २४ घण्टामा १३६ जना संक्रमण मुक्त भएका छन् । संक्रमण मुक्त हुनेको कुल संख्या १८ हजार ३५० पुगेको छ ।