धनुषामा ६३ सहित प्रदेशमा २ सय ५२ जनामा कोरोना संक्रमण,अहिलेसम्म ९६ जनाको मृत्यु

गोबिन्द महतो/जनकपुरधाम

धनुषा । धनुषामा ६३ जना सहित प्रदेश २ मा थप २ सय ५२ जनामा कोरोना संक्रमण देखिएको छ ।

प्रदेश २ को ८ जिल्लामा ५५ महिला र १ सय ९७ पुरुषमा गरी कूल २ सय ५२ जनामा कोरोना संक्रमण पुष्टि भएको स्वास्थ्य निर्देशनालय वरिष्ठ जनस्वास्थ्य प्रशासक विजय झाले जानकारी दिए ।

राष्ट्रिय जनस्वास्थ्य प्रयोगशाला काठमाडौँ, प्रादेशिक जनस्वास्थ्य प्रयोगशाला जनकपुर र नारायणी उपक्षेत्रीय अस्पताल वीरगंजमा गरिएको परीक्षणमा बिहिवार सबैभन्दा बढी पर्सामा ६९ जनामा कोरोना संक्रमण पुष्टि भएको छ । त्यस्तै धनुषामा ६३, रौतहटमा ४६, सर्लाहीमा ३०, बारामा २५ र महोत्तरीमा १९ जनामा कोरोना देखिएको हो ।

प्रदेश २ सामाजिक विकास मन्त्रालयका अनुसार प्रदेशमा एकजनाको मृत्यु भएको छ । सप्तरीको राजविराज नगरपालिका ७ का ५५ वर्षीय एक पुरुषको कोरोना संक्रमणबाट मृत्यु भएको छ । यससँगै मृत्यु हुनेको संख्या ९६ पुगेको छ । कोरोनाबाट सबैभन्दा बढी पर्सामा ३६, बारामा १५, धनुषामा १२, महोत्तरीमा १०, सिरहामा ८, सप्तरीमा ७, रौतहटमा ५ र सर्लाहीमा ३ जनाको मृत्यु भएको छ ।

त्यसैगरी ८ महिला सहित १ सय ८३ जना कोरोना संक्रमित निको भएर आफ्नो घर फर्केका छन् । यससँगै कोरोनाबाट निको हुनेको संख्या ५ हजार २ सय ५४ पुगेको छ । हाल यस प्रदेशमा ५ हजार ४ सय ५८ जना सक्रिय संक्रमित रहेका छन् ।