दीपक रावल,
कोहलपुर, साउन २३,
पछिल्लो समय बाँके जिल्लामा पनि आँखा पाक्ने समस्या बढ्दो क्रममा रहेको छ ।
यतिबेला देशैभर फैलिएको यो रोगले कोहलपुरका अधिकांस नागरिकहरु संक्रमण भैरहेको छ । कोहलपुर सहित बाँकेका विभिन्न आँखा अस्पतालमा सयौँको सङ्ख्यामा बिरामीहरु उपचारका लागी पुग्ने गरेका छन् । नेपालगंज मेडिकल कलेज शिक्षण अस्पताल कोहलपुरमा पनि आँखा पाकेका विरामीहरु उपचारका लागि दैनिक आईरहेका छन् । आँखा रातो हुने, चिलाउने, बिझाउने, आँखामा चिप्रा लाग्ने तथा पाक्ने समस्या देखिने बिरामीहरुको सङ्ख्या अत्याधिक छ ।
यतिबेला विभिन्न अस्पतालमा आँखा पाक्ने रोगको समस्या लिएर आउने बिरामीको संख्या उच्च छ । पछिल्लो केही दिनयता यहाँका अस्पतालहरुमा आँखा पाक्ने समस्या भएका बिरामीहरुको चाप बढेको हो । यो एक सरुवा रोग भएको सतर्कता अपनाउन नेपालगंज मेडिकल कलेज शिक्षण अस्पताल कोहलपुरका आँखा रोग विषेशज्ञ डा. नन्दा गुरुङले बताएकी छन् । यसबाट बच्नका लागि सकेसम्म बिरामीको सम्पर्कबाट बच्ने, आँखा सफा राख्ने, अरुको चश्मा तथा लेन्सको प्रयोग नगर्ने, जथाभावी औषधिको प्रयोग नगर्ने, आँखाको सरसफाइमा विशेष ध्यान दिने, फोहोर हात वा हात नपखाली आँखा नमाड्ने र आँखा सम्बन्धि केही समस्या परेमा तुरुन्त डाक्टरसँग परामर्श लिएर सोही अनुरुप औषधिको प्रयोग गर्न डा. गुरुङको सुझाव छ ।
डा. गुरुङले आँखा पाक्ने रोग लागेकोखण्डमा आँखालाई दिनको दुई–तीन पटक मनतातो पानीले सफा गर्ने, आँखा बन्द गरेर बस्ने, आराम दिने, चिसो बरफले सेक्ने, हरियो हेरियो वातावरण हेर्ने, आफूले प्रयोग गरेको रुमाल, चश्मा, मोबाइल अरुलाई प्रयोग गर्न नदिनाले आँखा पाक्ने रोगबा बच्न सकिने बताईन् । उनले भाइरल इन्फेक्सन र ब्याक्टेरीयाको कारणले आँखा पाक्ने समस्या देखिने गरेको बताइन् । डा. गुरुङले भनिन्,–‘आँखा पाक्ने समस्या जुनसुकै उमेर समूहमा हुनसक्छ । यो एकदम फैलिन सक्छ । आफूले प्रयोग गर्ने रुमाल, साबुन छुट्टै राख्नुपर्छ । विषेशगरि आँखाको आँसुबाट फैलिन्छ । त्यसकारण कुनै व्यक्तिको आँखा पाकेको छ भने उसले परिवारलाई सर्न नदिनका लागि समय समयमा साबुन पानीले हात धुनुपर्छ, स्यानिटाइजर प्रयोग गर्नुपर्छ । आँखा छोइसकेपछि राम्रोसँग साबुन पानीले हात धुनुपर्छ।’
तपाईको प्रतिक्रिया