भारतमा कोरोना संक्रमित राखिएको अस्पतालमा आगलागी,८ जनाको मृत्यु

काठमाडौं । भारतमा कोरोना संक्रमित राखिएको अस्पतालमा आगलागी भएको छ । अस्पतालमा आगो लाग्दा ८ जनाकाे मृत्यु भएकाे छ ।

गुजरातको अहमदाबाद शहरको नवरंगपुर इलाकामा रहेको कोरोना सङ्क्रमित राखिएको अस्पतालमा आगो लाग्दा ३ महिलासहित ८ जना बिरामीको ज्यान गएको हाे ।

राति ३ बजेतिर लागेको आगो एक घण्टामै निभाइए पनि ८ जनाको भने ज्यान गएको भारतीय सञ्चारमाध्यमले जनाएका छन् ।

आगो लागेपछि त्यहाँ रहेका ४० जना बिरामीलाई एसपीवी अस्पताल सारिएको छ । अस्पतालमा रहेका सबै जना कोरोना सङ्क्रमित हुन् । उद्धारमा खटिएका सबैजनालाई क्वारेन्टाइनमा राखिएको छ । मुख्यमन्त्री विजय रुपाणीले घटनाबारे तत्काल छानविन गर्न निर्देशन दिनुभएको छ । विद्युत सर्ट भएर आगो लागेको भारतीय सञ्चारमाध्यमले जनाएका छन् ।

यसैबीच भारतीय प्रधानमन्त्री नरेन्द्र माेदीले ट्वीटरमार्फत आगलागीकाे घटनाप्रति दु:ख व्यक्त गर्नुभएकाे छ ।