चीनले भारतविरुद्ध प्रदर्शन गर्न नेपाली संस्थाहरुलाई करोडौं रुपैयाँ दिएको खुलासा

काठमाडौं  । भारतको स्वतन्त्र समाचार संस्था आइएएनएसले उत्तरी छिमेकी चीनले भारतविरुद्ध प्रदर्शन गर्न नेपाली संस्थाहरुलाई करोडौं रुपैयाँ दिएको खुलासा गरेको छ ।

यो समाचार आइएएनएसले गुप्चर एजेन्सीलाई उद्धृत गर्दै नेपालका विभिन्न संस्थाहरुलाई चीनले २ करोड ५० लाख रुपैयाँ लगानी गरेको उल्लेख गरेको छ।

नेपाल–भारत सीमा विवादलाई लिएर भारतीय मिडियाले पछिल्लो समय लगातार भ्रमको खेती गर्दै आइरहेको छ ।

आइएएनएसले गुप्चर एजेन्सीलाई उद्धृत गर्दै भारतसँग जोडिएको १७०० किलोमिटर लामो सीमा क्षेत्रमा प्रदर्शनका लागि उक्त रकम दिइएको गुप्चर एजेन्सीलाई उद्धृत गर्दै दावी गरिएको छ। चीनबाट पैसा पाउनेमा भारतविरोधी संस्थाहरु रहेका छन्।

जसले पछिल्ला समयमा वार्ताका क्रममा रहेका सीमा विवाद उछाल्ने र नेपालको आन्तरिक र राजनीतिक मामिलामा हस्तक्षेप गरेको भन्दै प्रदर्शन चर्काउने उल्लेख छ।

चीनले खुलेआम भारतविरुद्ध मोर्चाहरु खडा गर्न आर्थिक सहयोग गरिरहेको खबरहरु आइरहेका बेला केपी शर्मा ओलीको कम्युनिस्ट सरकार भने चुप छ।

नेपाल भारत सिमा विवादलाई लिएर प्रधानमन्त्री ओली र चिनियाँ राजदूतलाई लिएर भारतीय मिडियाले उच्छृङ्खल समाचार सार्वजनिक गरेको थियो । त्यसबेला आपत्ति जनाएको परराष्ट्र मन्त्रालयले अहिले भने केही बोलेको छैन ।

नेकपासँग चिनियाँ कम्युनिस्ट पार्टीको सम्बन्ध त प्रशिक्षण दिने तहमै पुगेको छ। यस्तो अवस्थामा सरकार नबोल्नु भनेको चीनको भारतविरोधी गतिविधिलाई समर्थन जनाउनु जस्तै हो।