काठमाडौं । सत्तासीन नेकपाको स्थायी कमिटी बैठक असार २६ गतेसम्मका लागि भन्दै फेरि स्थगित भएको छ । भालि २६ गते शुक्रबार विहान ११ बजे बस्ने गरि हिजो निर्धारित बैठक पनि स्थगित भएको हो । सोमबार र मंगलबार अध्यक्षद्धय केपी ओली र प्रचण्डले एक्लाएक्लै छलफल गरेपछि स्थायी कमिटी बैठकलाई निरन्तरता दिने सहमति भएको थियो । तर, अन्तिममा आएर बैठक स्थगित गरिएको छ।
ओली र प्रचण्डबीच विगत केही दिनयता एक्ला एक्लै गम्भीर छलफल भइरहेको छ । पार्टीको जारी स्थायी कमिटी बैठक रोकेर दुई अध्यक्षबीच छलफल गर्दै समस्या समाधानका उपाय खोजी भइरहेको भन्दै बैठकको मिति पटक पटक सार्ने काम भैरहेको छ । यो अवस्थाले पार्टी भित्रको बैचारिक र सांगठानिक अवस्था लथालिंग भैरहेको भन्दै तल्लो तहका कार्यकर्ता पंक्तिमा निराशा बढाएको छ ।
बिश्वस्त स्रोतले जनाए अनुसार दुवै अध्यक्षले छलफल गर्दै टुंगो नलागेका बिषयहरुलाई स्थायी कमिटीबाटै टुंगो लगाउने सहमति बनाउने गरेका छन् । तर प्रधानमंत्री ओलीले स्थायी कमिटीमा आफ्नो बहुमत नहुने स्थिति देखेर बैठक स्थगित गर्दै आएका छन् । हिजो पनि स्थगितले नै निरन्तरता पाएको छ । हिजो बुधबार बस्ने भनिएको स्थायी कमिटी बैठक अगावै अध्यक्षद्वयबीच ‘वान टु वान’ छलफल हुने समझदारी भएको जनाइएपनि अध्यक्षहरुको बैठक नबसेरै एकाएक स्थायी कमिटी बैठक स्थगित भएको हो ।
प्रधानमन्त्री केपी ओलीले कुनै हालतमा सत्ता नछाड्ने अडान लिएपछि उनका विरोधी समूह गल्दै गएका छन् । ओलीले पार्टी विभाजनसम्मको निर्णय लिनसक्ने देखेर त्रसित बनेको विरोधी समुह अब केही पाइला पछि सरेर भएपनि ओलीसँग सहमतिको प्रयास गर्न अग्रसर भएका छन् । ओलीले संकटकाल लगाएर आफूहरुलाई थुन्न पनि सक्ने त्रासमा प्रचण्ड र माधव नेपालले ओली बिरुद्द कडा कदम चाल्न नसक्ने अवस्था देखिएको छ । प्रचण्ड माआवादी शिविरमा भएको आर्थिक अनियमिततामा तानिने त्रासमा छन् भने माधव नेपाल बाल्वाटार जग्गा प्रकरणमा तानिन सक्ने बलियो सम्भावना रहेको छ । आफ्ना बिराधीहरुका कमजोरीलाई अंकूश लगाएर बसिरहेका ओलीले सबै बिकल्पहरु आफू अनुकूल बनाएर मात्र स्थायी कमिटी बैठक बसाल्ने सोचाई बनाएको देखिन्छ ।
यता उपाध्यक्ष बामदेव गौतम र महासचिव विष्णु पौडेल नियमित जसो बैठक बसेर सहमतिको विकल्प खोज्न सक्रिय भएको बुझिएको छ । दुवै नेता कुनै हालतमा पार्टी फुट्न दिन नहुने पक्षमा रहेका छन् । ओलीलाई तत्काल प्रधानमन्त्रीबाट हटाउन कानुनी जटिलताहरु पनि रहेको निष्कर्षमा यी दुबै नेताहरु पुगेका छन् । । ओलीले राजीनामा दिएमा बाहेक हटाउन सकिने अवस्था चुनौतीपूर्ण हुने निष्कर्षमा नेताहरु पुगेका छन् । ओलीको हठका अगाडि सम्पूर्ण पार्टी नै बन्धक बन्ने अवस्था बिकसित भएको छ । यस्तो अवस्था आउनुमा राष्ट्रपति बिद्या भण्डारी पनि प्रधानमंत्रीकै पक्षमा प्रस्तुत हुने भएकाले बिकससित भएको हो । प्रधानमंत्री ओलीलाई अविश्वासको प्रस्तावले मात्र हटाउन सकिने अवस्था भएको तर बिरोधीहरुले त्यो हिम्मत गर्न सकिरहेका छैनन् । त्यस्तो जोखिम उठाईएमा सत्तासीन नेकपामा एकले अर्कालाई सिध्याउनेसम्मको प्रतिष्पर्धा बिकसित हुने खतरा पनि देखिएको छ ।
ओलीले पार्टी फुटाउने सम्मको जोखिम मोल्न पनि तयारी गरिरहेको देखिन्छ । अध्यादेश ल्याएर भएपनि अगाडि बढ्ने संकेत ओलीले गरिसकेका छन् । अध्यादेश बाहेकको अवस्थामा नेकपा फुट्ने मार्ग देखिदैन । यसमा संवैधानिक र कानुनी जटिलता रहेकाले मात्र ओली खुम्चिएका छन् । त्यसैले नै ओलीले संसदको बैठकसमेत स्थगित गरेर आफ्ना लागि बाटो सफा बनाएका छन् । बिकल्पका लागि ओलीले नेकपा एमाले नामको पार्टी दर्ता समेत गरिसकेका छन् । प्रचण्ड या अन्य कुनै नेताले चाहेर पनि नेकपा फुटाउन सक्ने अवस्था छैन । किनभने राजनीतिक दलसम्बन्धी ऐनमा पार्टी एकीकरणको पाँच वर्ष पुरा नभई फुटाउन नपाइने उल्लेख छ । नेकपा एकीकरण भएको दुई वर्ष मात्र पुरा भएको अवस्था छ ।
-जनधारणा साप्ताहिक
तपाईको प्रतिक्रिया