काठमाडौं- नेपाल औषधि उत्पादक संघले स्वदेशमा उत्पादित ह्यान्ड स्यानिटाइजर गुणस्तरीय रहेको दाबी गरेको छ।
संघले काठमाडौंमा पत्रकार सम्मेलन गरी स्वदेशमा उत्पादित स्यानिटाइजर गुणस्तरीय रहेको दाबी गरेको हो। स्वदेशमा उत्पादित स्यानिटाइजरमाथि प्रश्न उठेको भन्दै गुणस्तरमा कहिल्यै पनि सम्झौता नगर्ने संघका महासचिव विप्लव अधिकारीले उल्लखे गरे ।
औषधि व्यवस्था विभागले स्यानिटाइजरको गुणस्तर मापन गर्ने विधि नै प्रभावकारी र विश्वसनीय नरहेको संघको धारणा छ। पत्रकार सम्मेलनमा उपस्थित आइएसओ मान्यताप्राप्त जेष्ठ ल्याबोरोटरीका विज्ञ शोभा बस्नेतले नेपालमा उत्पादित स्यानिटाइजर गुणस्तरीय रहेको बताइन्। स्यानिटाइजरको गुणस्तर मापन गर्ने विभागको विधि नै प्रभावकारी र विश्वसनीय नरहेको उनले जनाइन् ।
‘नेपाली उत्पादकले उत्पादन गरेको औषधि विदेशी उत्पादन भन्दा कुनै कमी छैन,’ उनले भनिन्, ‘विभागले स्यानिटाइजरको गुणस्तर मापन गर्ने विधि खासै प्रभावकारी र विश्वसनीय भएको हामीले पाएका छैनौ।’
संघका निर्वतमान अध्यक्ष दीपकप्रसाद दाहालले सरकारले स्वदेशी उत्पादनलाई बढावा दिनुको सट्टा मनोबल गिराउने काम गरेको बताए। लकडाउनको समयमा भारत र चीनले स्यानिटाइजरको आयात रोक्दा स्वदेशी उत्पादनले बजार धानेको उनले भने
ह्यान्ड स्यानिटाइजरको दर्ताका सरकारले तीन महिना थप गरेको विरोधमा संघ आन्दोलनमा उत्रिएको छ। आन्दोलनका कार्यक्रम स्वरुप उनीहरुले विभागमा बिहीबार चौथो दिन पनि धर्ना दिएका छन्।
सरकारले गुणस्तर सुनिश्चित गरेर बिक्री–वितरण गर्नुपर्नेमा बिना दर्ता तीन महिना स्यानिटाइजर बिक्री गर्न दिने निर्णय गरेको भन्दै संघ आन्दोलनमा उत्रिएको छ।
मन्त्रिस्तरीय निर्णय गर्दै असार २२ गते स्यानिटाइजरको दर्ताको लागि तीन महिना समय थप गर्ने निर्णय गरेको थियो।
विभागमा दर्ता भई स्वदेशमै इथानोलको प्रयोग गरी ४० वटा उद्योगले १ सय २० वटा ब्रान्डका स्यानिटाइजर उत्पादन गरिरहेको संघले जनाएको छ। ४० वटा उद्योगमध्ये करिब ३५ वटा स्वदेशी र ५ वटा विदेशी उद्योग रहेको महासचिव अधिकारीले जानकारी दिए। हाल दैनिक २ सय देखि ३ सय प्रतिलिटर स्यानिटाइजर उत्पादन गर्न सक्ने क्षमता रहेको उनले बताए। आफूहरुले विभागको मूल्य अनुसार स्यानिटाइजर बिक्री–वितरण गरेकाले मूल्यमा एकरुपता रहेको उनीहरुको दाबी छ।
सरकारले आफूहरुको माग सम्बोधन नगरेसम्म आन्दोलनका कुनै पनि कार्यक्रम नरोकिने संघले जनाएको छ।स्यानिटाइजरको दर्ताका लागि तीन महिना थप गरेको निर्णय विरुद्ध आन्दोलनमा उत्रिएको संघले बुधबार पनि औषधि व्यवस्था विभागमा धर्ना दिएको हो।
सरकारले गुणस्तरको सुनिश्चितता गरेर बिक्री वितरण गर्नुपर्नेमा बिना दर्ता तीन महिना स्यानिटाइजर बिक्रि गर्न दिने निर्णय गरेको भन्दै संघ आन्दोलनमा उत्रिएको छ। सरकारको ध्यानाकर्षण स्वरुप बुधबार पनि औषधि व्यवस्था विभागमा धर्ना दिएको संघका महासचिव विप्लव अधिकारीले जनाए ।
यसअघि संघले निर्णय सच्याउनुपर्ने भन्दै विभागमा पत्राचार समेत गरेको थियो। आफूहरुको माग सुनुवाइ नभएपछि आन्दोलनमा उत्रन बाध्य भएको संघले जनाएको छ। मन्त्रिस्तरीय निर्णय गर्दै असार २२ गते स्यानिटाइजरको दर्ताको लागि तीन महिना समय थप गर्ने निर्णय गरेको थियो।
तपाईको प्रतिक्रिया