कक्षा १२ को परीक्षा असोजमा

काठमाडौं । राष्ट्रिय परीक्षा बोर्डले कक्षा १२ को परीक्षा असोज महिनामा गर्ने तयारी गरेको छ ।

सरकारले मङ्गलबार रातिदेखि लकडाउन हटाउँदै भदौ १ गतेदेखि परीक्षा गर्न पाउने बाटो खुलाएपछि १२ कक्षाको तयारी भएको हो । तर असोज महिनामा गरिने भनिए पनि दिन भने तोकिएको छैन । कोराेना भाइरसको जोखिमका कारण परीक्षा हुने/नहुने अन्याेल थियो ।

राष्ट्रिय परीक्षा बोर्डका सदस्य सचिव दुर्गाप्रसाद अर्यालले परीक्षा कसरी गर्ने भन्ने विषयमा अहिले छलफल भइरहेको र शिक्षा मन्त्रालयको स्वीकृति पाउनासाथ दिन तोकिने जानकारी दिनुभयो ।

१२ कक्षाको परीक्षामा चार लाख ३२ हजार विद्यार्थी सहभागी हुँदैछन् । यस्तै राष्ट्रिय परीक्षा बोर्डका सदस्य सचिव दुर्गाप्रसाद अर्यालले परीक्षा हुने निश्चित भएकाले तयारी थाल्न विद्यार्थीलाई आग्रह गर्नु भएको छ । उहाँले सुरक्षा सावधानी अपनाइने हुँदा ढुक्क हुन पनि विद्यार्थीलाई आग्रह गर्नुभएको छ ।