राष्ट्रिय स्वतन्त्र पार्टी कोहलपुर बाँकेको पार्टी कार्यालयको उद्घाटन

दीपक रावल,
कोहलपुर, साउन २०,

राष्ट्रिय स्वतन्त्र पार्टी कोहलपुर बाँकेको पार्टी कार्यालयको उद्घाटन गरिएको छ ।

पार्टीका कोहलपुर नगर सभापति भरत पनेरुको सभापतित्वमा भएको पार्टी कार्यालयको उद्घाटन लुम्बिनी प्रदेश महामन्त्री तथा संगठन विभाग प्रमुख निलराज अधिकारीले उद्घाटन गरेका हुन् । कोहलपुरको फुलबारीटोलमा स्थापना गरिएको पार्टी कार्यालयको शनिबार एक कार्यक्रमका बिच उद्घाटन गरिएको हो ।

पार्टी कार्यालयको उद्घाटन गर्दै महामन्त्री तथा संगठन विभाग प्रमुख निलराज अधिकारीले स्वतन्त्र पार्टी उचित समयमा उचित निर्णयका साथ जनताका बिचमा आएको बताए । उनले आफ्नो पार्टीबाट जनताले चाहेको परिवर्तन सम्भव भएको बताए । देशको विकास तथा देश परिवर्तनका लागि उल्लेख गरे । उनले भने,–‘बोल्नुभन्दा पनि काम गर्ने कुरामा हामीले जोड दिन्छौं ।’ उनले अब समाज परिवर्तको बेला भएकाले पुराना कुरा बिर्सेर सबै नागरिक एक हुनुपर्ने बताए ।

राष्ट्रिय स्वतन्त्र पार्टीको सङ्गठनात्मक ढाँचामा केन्द्रीय समिति, प्रदेश समिति, पालिका समिति र वडा समिति रहेको नगर सभापति पनेरुले बताएका छन् । पनेरुले पार्टीको सदस्यता लिनका लागि कुनै पनि मापदण्ड नरहेको बताए । उनले भने,–‘सम्बन्धित तहमा राजनीतिक प्रकृतिका हुन् । यी समितिको सदस्य हुन चाहिने मापदण्ड भनेको भेला वा अधिवेशनबाट निर्वाचित हुनु हो । यसमा पार्टी सदस्य बाहेक अन्य मापदण्ड तोकिएको छैन ।’ उनले केन्द्रीय समिति अन्तरगत रहने गरि केन्द्रीय विभागहरू, प्रदेश समिति अन्तरगत रहने गरि प्रदेश विभागहरू र पालिका समिति अन्तरगत रहने गरि पालिका विभागहरू रहेको जानकारी दिए ।

राष्ट्रिय स्वतन्त्र पार्टीको पार्टी कार्यालय उद्घाटनका क्रममा उनले विभागहरू विषयअनुसार रहेको बताउँदै पार्टीलाई आवश्यक विज्ञताका लागी विभिन्न विभागहरू गठन भएको बताए । उनका अनुसार कुल ३६ वटा विभागहरू छन् । नजसमध्ये अर्थ नीति विभाग, शिक्षा विभाग, स्वास्थ्य विभाग, कृषि विभाग हुन् । केन्द्रीय विभागको सदस्य र प्रदेश विभागको प्रमुख हुनका लागी केही योग्यता तोकिएको उनको भनाई छ । उनले मास्टर्स डिग्रि अध्ययन गरेको हुन पर्ने, मास्टर्स डिग्रि नभए सम्बन्धित क्षेत्रमा १० वर्ष अनुभव रहेको हुनपर्ने, मास्टर्स डिग्रि नभए र अनुभव पनि नभए सम्बन्धित क्षेत्रमा असाधारण सफलता हासिल गरेको हुनपर्नेछ जानकारी दिए । उनी भन्छन्,–‘कृषि विभागमा बसेर काम गर्न चाहनुहुन्छ भने कृषि क्षेत्रमा मास्टर्स डिग्रि गरेको हुनपर्छ । पढेको हुनुहुन्न भने किसानको काम गरेको १० वर्ष बढी हुनपर्छ वा यसमा केहि असाधारण काम गरेको हुनपर्छ ।’

रास्वपाले प्रदेश विभागको सदस्य र पालिका विभाग प्रमुख हुनका लागी स्नातक, डिग्रि वा ५ वर्ष अनुभव वा असाधारण सफलता हासिल गरेको हुनुपर्ने मापदण्ड बनाएको छ । त्यस्तै पालिका विभाग सदस्यका लागी १२ पास वा २ वर्ष अनुभव वा असाधारण सफलता हासिल गरेको हुनुपर्ने रास्वपाको मापदण्ड छ । उद्घाटन समारोहको संचालन सिएम उपाध्ययले गरेका थिए ।