दुहूँ गाउँपालिकामा पहिरो पीडितलाई २ लाख ६८ हजार राहत

दार्चुला । दुहूँ गाउँपालिका वडा नम्बर ३ पहिरो पीडितलाई २ लाख ६८ हजार राहत रकम हस्तान्तरण गरिएको छ ।
मलेसियामा व्यवासाय गर्दै आएका गैरआवासीय नेपाली संघ (एनआरएनए) का सदस्य जनक बहादुर बम र हाम्रो नेपाल हामी नेपाली अभियानका केन्द्रिय सदस्य दिपक बहादुर बमको संयोजकत्वमा संकलित राहत रकम शनिबार पहिरो पीडित परिवारलाई वितरण गरिएको हो । साउन १३ गते पहिरोले घर पुरिदा आमा–गुमाएका र घरमा पहिरोले क्षेति पुगेका पहिरो पीडित परिवारलाई २ लाख ६८ हजार ९२ रुपैयाँ राहत वितरण गरिएको हो ।
साउन १३ गते वडा नम्बर ३ ब्रह्मदेव सल्लेखेतीमा पहिरोले घर पुरिदाँ रामदत्त जोशी र उनका श्रीमती इन्द्र जोशीको ज्यान गएको थियो । मृतका दुई छोरा–छोरीको अहिले बिचल्ली भएको छ । पहिरोले घर पुरिएपछि आमा–बुवा गुमाएका सुनील र कनकलता ठूलबुवाको घरमा आश्रय लिएर बसिरहेका छन् ।
पहिरोले घर पुरिएको र आमाबुवा गुमाएका सुनील र कनकलतालाई १ लाख ७१ हजार ६ सय ६६ रुपैयाँ राहत वितरण गरिएको छ । यस्तै पहिरोले घरमा क्षेति पुगेका केशब बम र प्रजीत बोहराको परिवारलाई पनि राहत वितरण गरिएको छ ।  केशब बमको परिवारलाई ५१ हजार ६ सय ६६ रुपैयाँ र प्रजीत बोहराको परिवारलाई ४१ हजार ७ सय ६० रुपैयाँ राहत रकम वितरण गरिएको तरुण दल दुहूँका अध्यक्ष प्रकाश बहादुर कार्कीले बताउनु भयो ।
यस्तै यसअघि पनि हाम्रो नेपाल हामी नेपाली अभियानले विदेश तथा स्वदेशबाट राहत रकम संकलन गरेर वितरण गरेको थियो । यसरी विभिन्न संघ संस्था तथा अभियानहरुबाट राहत पाएपनि पीडित परिवारले स्थानीय सरकार, प्रदेश सरकार तथा केन्द्र सरकारबाट भने कुनै राहत पाएका छैनन् । अन्य संघ संस्थाहरुले राहत वितरण कार्यक्रममा सहभागि भए पनि स्थानीय सरकारले राहत वितरण गर्न सकेको छैन् ।
दुहूँ गाउँपालिकाले कार्यविधि बमोजिम एक जनाको मृत्यु भएमा मृतक परिवारलाई ५० हजार दिने व्यवस्था अनुसार वितरण गर्ने तयारी गरेको छ । मृतक परिवारलाई ५० हजार र घरमा क्षेति पुगेका परिवारलाई २५ हजार राहत दिने निर्णय भएको छ । गाउँपालिका उपाध्यक्ष ईश्वरी जोशीका अनुसार गाउँपालिकाले कार्यविधि बमोजिम राहत दिने निर्णय गरिसकेको बताएका छन् । निर्णय गरेपनि गाउँपालिकाबाट पीडित परिवारले राहत पाएका छ्रैनन् तर अन्य क्षेत्रबाट राहत पाएका छन् ।
वडा नम्बर ३ का वडाध्यक्ष लालबहादुर बमको अध्यक्षता एवं जिल्ला समन्वय समिति प्रमुख करबीर बहादुर कार्की प्रमुख आतिथ्यता राहत वितरण गरिएको हो । यस्तै राहत वितरण कार्यक्रममा गाउँपालिका अध्यक्ष पुलेन्द्रबहादुर कार्की र उपाध्यक्ष ईश्वरी जोशीको पनि सहभागिता रहेको थियो ।