कञ्चनपुरको शुक्लाफाँटा नगरपालिका–७ को वडा कार्यालयमा अज्ञात समूहले आगजनी गरेको छ ।
प्रज्ज्वलनशील पदार्थ छर्किएर बुधवार राति अज्ञात समूहले आगजनी गरेको नगरपालिकाले जनाएको छ ।
झ्यालको सिसा फुटाएर कार्यालयमा आगजनी गरिएको वडा सचिव महेश भट्टले बताए । आगजनीबाट कम्प्युटर, सोफा, कार्पेट, कुर्सी र टेबुल जलेको उनले जानकारी दिए ।
घटनाको अनुसन्धान भइरहेको इलाका प्रहरी कार्यालय झलारीका प्रहरी निरीक्षक धर्मेन्द्र रावलले बताए । क्षतिको विवरण संकलनका साथै प्रारम्भिक अनुसन्धान गरिरहेको उनको भनाइ छ ।
जिल्ला प्रहरी कार्यालय कन्चनपुरले पनि आवश्यक छानबिन भइरहेको बताएको छ ।
यसअघि ५ साउनमा कैलालीको घोडाघोडी नगरपालिकाको गाडीमा अज्ञात समूहले आगजनी गरेको थियो ।
तपाईको प्रतिक्रिया