स्थानीय सरकार सन्चालन देखि अहिले सम्म आयव्यय सार्वजनिक नगरेको भन्दै वडा कार्यालयमा ताला बन्दी

दार्चला । दार्चला जिल्लाको लेकम गाउँपालिका वडा नम्बर २ को कार्यालयमा तालाबन्दी गरिएको छ । वडा कार्यालय स्थापना देखिको सम्पूर्ण आयव्ययको खर्च वितरण सार्वजनिक गर्नुपर्ने सहितका १० बुद्धे मागहरु राख्दै वडा नम्बर २ का स्थानियहरुले तालाबन्दी गरेका हुन् । यस अघि असार २४ गते स्थानिय युवाहरुले वडा कार्यालयमा तालाबन्दी गरेका थिए ।

वडाले माग सम्बोधन गर्न साउन ९ गते सम्मको समय माग गरेको भएपनि वडा कार्यालयबाट चित्तबुझ्दो जवाफ तथा माग सम्बोधन नभएपछि पुनः साउन ९ गते १० बजे राती कार्यालयमा तालाबन्दी गरिएको स्थानिय राजेश जोशीले जानकारी दिए ।

स्थानिय सरकार संचालन भएदेखि वडाको हालसम्मको आयव्यय सार्वजनिक गर्नुपर्ने, योजनाहरुको पारदर्शीता देखाउनुपर्ने, राहत वितरणको खर्च विवरण सार्वजनिक गर्नुपर्ने माग राखेका छन् ।

यस्तै सेवाग्राहीले समयमै सेवा नपाएको, चमेलिया कुणी कुँस्काडा खानेपानी योजनाको दुई वर्षसम्म समिति गठन हुन नसक्नुको कारण खुलाउनुपर्ने, डिपिआर बिनै बजेट भुक्तानी हुनुको कारण स्पष्ट पार्नुपर्ने , विपद व्यवस्थापनको लागि उद्धार सामाग्रीहरु बाटैबाटो गैरकानुनी ढंगले वितरण गरिएको, सामाजिक सुरक्षा भत्ताको विवरण, कर्मचारी भर्ना प्रकृया तथा तलब भत्ताको स्रोत खुलाउनुपर्ने सहितका १० बुद्धे मागहरु राखिएको जोशीले बताए ।