काठमाडौं । जनता समाजवादी पार्टी (जसपा) नेपालका अध्यक्ष उपेन्द्र यादवको कर्तुतले पार्टीका नेता कार्यकर्ता आक्रोशित बनेका छन् । सत्ता र शक्तिका लागि आफ्नै विरोधी, मधेसी विरोधी शक्तिसँग हात मिलाउने, अप्राकृतिक सहकार्य गर्ने उपेन्द्रले चुनावको मुखमा पनि यही रवैया देखाएपछि नेता कायकर्ता असन्तुष्ट बन्दै निष्क्रिय भएका हुन् ।
केहीले त पार्टी नै परित्याग गरेका छन् । बिहीबार जसपाका रेमन्त झाले पनि पार्टी परित्याग गरेका छन् । उपेन्द्रले चुनावको मुखमा हुँदाछँदाको सत्ता गठबन्धन छोडेर एमालेसँग हात मिलाएका छन् । एमाले मधेसमा विरोधी पार्टीका रुपमा चिनिन्छ । नागरिकता विधेयक होस् वा मधेस आन्दोलनमा एमालेको भूमिकालाई लिएर मधेसी समुदाय असन्तुष्ट छ । त्यसमाथि सरकारमा हुँदा एमालेले जसपाका सांसद नै अपहरण गरेर पार्टी फुटाउने प्रयास गरेको थियो ।
जसपा सांसद सुरेन्द्र यादवले एमाले नेता महेश बस्नेत र पूर्वआईजीपी सर्वेन्द्र खनालले आफूलाई अपहरण गरेर होटलमा बन्धन बनाएको र आफू कसैगरी फुत्किन बाध्य भएको बताएका थिए । स्वयं उपेन्द्रले पनि एमालेले आफ्नो सांसदलाई एमालेले अपहरण गरेको भन्दै आक्रोश पोखेका थिए । तर अहिले त्यही अपहरणकारी भनेको पार्टीसँग सहकार्य गरेपछि नेता कार्यकर्तामा असन्तुष्टि छाएको हो ।
आफ्नै नेता कार्यकर्ताको अपहरण गर्ने, मधेसको अवमूल्यन गर्ने शक्तिसँग चुनावमा गठबन्धन गरेको भन्दै धेरै नेता कार्यकर्ता निष्क्रिय बनेका छन् । मधेसका विभिन्न जिल्लामा कार्यकर्ताहरुले पार्टी नै परित्याग गरेर कि लोसपा कि त सत्ता गठबन्धनका अन्य दलका प्रवेश गरिरहेका छन् । उपेन्द्र उठेको सप्तरी २ मै यसको असर देखिएको छ । यहाँ असन्तुष्ट जसपाका कार्यकर्ता लोसपा वा सीके राउतको जनमत पार्टीमा प्रवेश गरेका छन ।
पछिल्ला दिनमा कार्यकर्ताको परित्यागले जसपा जिल्ला नेतृत्व र स्वयं उपेन्द्रलाई चिन्तित बनाएको नेताहरु बताउँछन् । अर्कोतिर मधेस विरोधी छवि भएको दलसँग सहकार्य गरेका उपेन्द्रले आफ्नै क्षेत्रमा एमालेको (बागी उठ्नु)साथ नपाउनुले पनि कार्यकर्तामा निराशा छाएको छ ।
तपाईको प्रतिक्रिया