काठमाडौं । जसपाका अध्यक्ष उपेन्द्र यादवको अहिले मधेसमा परिचय बनेको सत्ता लोभी । सत्ता र शक्तिका लागि जुनसुकै शक्तिसँग हात मिलाउने र जुनसुकै हदसम्म जाने उनको शैलीले पराकाष्ठा नाघिसकेको छ । मधेस मुक्ति र हक अधिकारका लागि आन्दोलन गरेर, सयौं युवालाई शहिद बनाएर सिंहदरबारको यात्रा तय गरेका उपेन्द्रले ती एजेण्डालाई फगत सत्ताको सिँढीमात्रै बनाए ।
मधेस मुक्तिका लागि थुप्रै नारा दिएका उपेन्द्रले मधेस मुद्दालाई एकपछि अर्को सत्तासँग साट्दै गएका छन् । उनको रवैया मधेस मुद्दा ओझेलमामात्र होइन समाप्त नै हुने चरणमा पुगेको छ । मधेसी दाजुभाइमाथि लगाएको झुठा मुद्दा फिर्ता, रेशम चौधरीको रिहाइ, संविधान संशोधनजस्ता थुप्रै मुद्दाहरु उपेन्द्रका लागि सत्तामा जाने बार्गेनिङमात्रै बन्ने गर्छ ।
सत्तामा गएपछि उनबाट कुनै पहल हुँदैन । सत्ताबाट बाहिरिएपछि यदाकदा उनलाई ती एजेण्डाहरुको याद आउँछ । एकछिन त्यसमा कराएपछि फेरि सत्ताको निम्तो पाइहाल्छन् । पछिल्लो संसदीय राजनीतिमा उपेन्द्रको यो शैली निरन्तर अघि बढिरहेको छ ।
एकपछि अर्को मधेस मुद्दालाई सत्तामा विलय गराउँदै गएका उपेन्द्र यसपालि फेरि त्यो शैलीलाई अगाडि बढाउन सप्तरी २ बाट चुनावी मैदानमा छन् । उनको यो शैलीबाट कार्यकर्ता नै आजित भइसकेको, वितृष्णा जागिसकेको बेला मतदाताले कस्तो निर्णय गर्छन् हेर्न बाँकी छ । तर मतदातामा पनि एकखालको आक्रोश बढेको स्थानीय बताउँछन् ।
तपाईको प्रतिक्रिया