काठमाडौं । मधेशी जनताको हक अधिकारको मतलाई सत्ता प्राप्ति र आफ्नो स्वार्थपूर्तिको भाँडो बनाएपछि मधेसमा अलोकप्रिय बनेका जसपा अध्यक्ष उपेन्द्र यादवले चुनाव जित्न नयाँ हत्कण्डा अपनाएका छन् ।
भाषणमा जातीय सदभाव कायम गर्नुपर्ने, निष्ठाको राजनीति गर्नुपर्ने भनेर अर्ती दिने उपेन्द्र चुनाव जित्न जुनसुकै हदसम्म जान तयार छन् भन्ने उनका हालसालैका गतिविधिले पनि देखाएको छ ।
अहिले उपेन्द्र उठेको सप्तरी २ मा जातीयताको नाराहरु सुनिन थालेका छन् । कुनै समय मधेशलाई उत्तर प्रदेशको माई गठबन्धन जस्तै मुस्लिम र यादवको वर्चश्व भएको राज्य बनाउन उद्दत उपेन्द्र अहिले आफू चुनाव जित्न जातीय नाराको सहारा लिएका छन् ।
आफ्नो कमजोर अवस्थाको आकलन गर्दै उनले आफूलाई यादवहरुको जनघनत्व रहेको क्षेत्रमा केन्द्रित गरेका छन् । भाइ, भतिज, मामा, भान्जा, काका, काकी तथा टाढासम्मका रिस्तेदार परिचालन गरेर उपेन्द्रले अन्तिम पटक जिताएर कुलको इज्जत जोगाइदिन जातीय रुपमा हारगुहार गरेको पाइएको हो ।
यादव बहुल क्षेत्रका एक मतदाताले काठमाडौंमा यादवको इज्जत जोगाउने उपेन्द्र नै भएकाले मत दिन उनका आफन्तबाट अनुरोध आएको बताए । तर आफू पढेलेखेको भएकाले काम नगर्ने र टुरिस्ट उपेन्द्रलाई भोट नहाल्ने उनको भनाइ छ ।
यसपालि उपेन्द्रको जातीय कार्ड पनि सफल नहुने मतदाताको मनस्थितिले देखाउँछ । किनभने मतदाता सचेत तथा नयाँ अनुहारमा अकर्षण देखिन्छ । फेरि हरेक मतदाता परिवारमा सल्लाह गरेर भन्दा स्वतन्त्र रुपमा मत हाल्न सक्ने चेतना विकास भइसकेको छ ।
उपेन्द्रले सबै दलका यादवहरुको जातीय भोट तानेर अन्तिम प्रयास गरे पनि त्यति अनुकूल नरहेको यहाँका अगुवा बताउँछन् । तर यस्तो राजनीतिले राष्ट्रिय राजनीतिमा हाइट बनाएका उपेन्द्रको असली चरित्र भने उदांगो भएको छ । समाजमा फाटो ल्याउने, विभाजित मानसिकताको राजनीति गरेर उनले आफ्नो व्यक्तिगत फाइदामात्रै हेर्ने गरेको पुष्टि भएको छ ।
तपाईको प्रतिक्रिया