काठमाडौं । सहकारी अभियानलाई आर्थिक सामाजिक रुपान्तरणको विश्वासिलो माध्यम बनाउन तथा सुसंस्कृत, मर्यादित र कानूनको परिपालनामा अव्वल बनाउन सहकारीको दीर्घकालीन रणनीति बनाउनु पर्ने आवश्यकता रहेको छ । सहकारी अभियन्ताहरुसंगको अन्तरक्रियामा भूमि व्यवस्था, सहकारी तथा गरिवी निवारण मन्त्रालयका सचिव डा दामोदर रेग्मीले सो कुरा बताएका हुन् ।
देशको अर्थतन्त्रको एउटा खम्वाको रुपमा रहेको सहकारी क्षेत्रसंग सुखी नेपाली समृध्द नेपालको अवधारणालाई सार्थक वनाउन संविधानले परिकल्पना गरेको समाजवाद उन्मुख अर्थतन्त्र निर्माण गर्न, दिगो विकास लक्ष्य हासिल गर्न र बहुआयामिक गरिवी सूचकहरुको सुधार ल्याउन महत्वपूर्ण भूमिका खेल्न सक्ने सामर्थ्य छ तर यसको लागि अव नयां सोच र सुसंस्कृत परिपाटीका साथ सहकारी अभियान अगाडी बढ्नु पर्ने कुरा उनले वताए । समुदायमा आधारित विकासको मूल मुद्दामा केन्द्रित सहकारी संस्थाहरु समन्यायिक विकास मार्फत देशमा आर्थिक सामाजिक रुपान्तरण गर्ने क्षमतालेयुक्त र भरोसायुक्त क्षेत्रमा रुपान्तरण हुन सक्ने प्रखर सामजिक उर्जाका क्षमताले युक्त छन् ।
सहकारीका मूलभूत आदर्श र सिध्दान्तहरुको व्यवहारिक प्रयोग र कानूनको परिपालना गर्ने परिपाटीको विकास तथा स्व अनुशासनको आदर्श मर्यादाको परिपालना हुन सकेमा सामाजिक उर्जाको रुपमा रहेका सहकारी क्षेत्र संस्थागत सुशासनको आयाममा समेत अव्वल सावित हुनु आवश्यक रहेको कुरा उनले बताए । आगामी दश वर्षभित्रमा सहकारी क्षेत्रले प्राथमिकता क्षेत्रमा बढाउने लगानी कृषि र यसका अन्तरसम्बन्धित क्षेत्रमा गर्ने लगानी र सो बाट गर्न सक्ने उत्पादनको पूर्वानुमान सहितको दीर्घकालीन रणनीतिको आवश्यकता रहेको र यसले उद्यमशीलता तथा आत्मनिर्भरता प्रबर्ध्दन रोजगारी सिर्जना , गरिवी न्यूनीकरण, आयात प्रतिस्थापन जस्ता क्षेत्रहरुमा योगदान दिनु पर्ने कुरामा उनले जोड दिए ।
कार्यक्रमका सहभागीहरुले सहकारीमा नकारात्मक प्रवृत्तिको नियन्त्रणका लागि स्व अनुशासन र कानूनको परिपालना गरेका सहकारीहरुलाइ प्रोत्साहन अहिलेको अवश्यकता रहेको तथा सहकारीमा स्वच्छता र सहकार्य अहिलेको आवश्यकता रहेको बताए। केही सहकारी संस्थाहरुमा देखिएको विकृतिले सारा सहकारीहरु आरोपित हुने स्थितिको अन्त्य गर्न सहकारी संस्थाका संघ महासंघहरु सक्रिय हुनु पर्ने उनीहरुको धारणा रहेको थियो ।
तपाईको प्रतिक्रिया