काठमाडौं । केन्द्रमा सत्ता समीकरण परिवर्तन भएसँगै नेपाली कांग्रेसले मधेस प्रदेशको मुख्यमन्त्रीमा दाबी गरेको छ ।
१० पुसमा केन्द्रमा गठबन्धन भत्किँदा मुख्यमन्त्री गुमाएको कांग्रेसले अहिले केन्द्रमा आफ्नो नेतृत्वको गठबन्धन बनेपछि प्रदेशमा दाबी अघि सारेको हो । अहिले मधेश प्रदेशमा जसपाबाट रामसरोज यादव मुख्यमन्त्री छन् ।
जसपालाई गठबन्धनमा उपराष्ट्रपति पद र अब विस्तार हुने मन्त्रिमण्डलमा मालदार मन्त्रालय दिने तयारी भएकाले शक्ति सन्तुलनका हिसाबमा मधेस प्रदेश सरकारको नेतृत्व कांग्रेसले लिन लागेको हो ।
यसबारेमा सत्ता गठबन्धनबाट निर्णय हुने कांग्रेस नेता अजयकुमार चौरासियाले बताए । मधेश प्रदेशमा कांग्रेस सबैभन्दा ठूलो दल भएकाले मुख्यमन्त्रीमा दाबी रहेको उल्लेख गर्दै चौरासियाले मुख्यमन्त्रीका विषयमा गठबन्धनभित्रबाट टुंगो लाग्ने बताए । अबको कार्यकाल कांग्रेसले सम्हाल्ने उनले स्पष्ट पारे ।
नेताहरुकाअनुसार कांग्रेसबाट कृष्णा यादव र वीरेन्द्र सिंह मुख्यमन्त्रीको दाबेदार छन् । ५ चैतमा केन्द्रमा सरकार विस्तार भएपछि प्रदेश मन्त्रिपरिषद् पुनर्गठनको तयारी गठबन्धनको छ ।
तपाईको प्रतिक्रिया