चाडपर्वहरु आ–आफ्नै घर भित्रमात्रै मनाउन पाइने

दार्चुला,
कोरोना संक्रमणको जोखिम बढ्दै गएको अवस्थामा जनस्वास्थ्यको रक्षालाई सर्वोच्च प्राथमिकता राखेर चाडपर्वहरु आ–आफ्नै घरभित्र रही जनस्वास्थ्यका मापदण्डहरु पालना गरेर मात्रै परिवारका सदस्यहरुसंग मनाउन जिल्ला प्रशासन कार्यालय दार्चुलाले सूचना जारी गरेको छ । धार्मिक स्थलहरुमा दैनिक नित्य, पुजन बाहेक अन्य कुनै पनि गतिविधि सञ्चालन नगर्न पनि प्रशासनले आग्रह गरेको छ ।
नेपाल सरकार मन्त्रिपरिषद्को मिति २०७७ साउन २६ गते बसेको बैठकले गरेको निर्णय अनुसार जिल्ला प्रशासनले सूचना जारी गरेको प्रमुख जिल्ला अधिकारी शरदकुमार पोखरेलले जानकारी दिए । बैठकको निर्णय अनुसार भारतसंग जोडिएका नेपालका सिमाहरु भदौ ३१ गते सम्मका लागि स्थगित गरिएको छ । बैठकले कोरोनाको विश्वव्यापी संक्रमणको कारणबाट उत्पन्न असहज परिस्थितिमा स्वदेश आउनै पर्ने अवस्थामा रहेका नेपाली नगरिकलाई स्वदेश आउन सहजीकरण गर्ने सम्बन्धि आदेश २०७७ संशोधनबाट भारतबाट स्थलमार्ग हुँदै स्वदेश आउने नेपालीको लागि नेपाल भारत सिमाका बिन्दुहरु समेत तोकिएको छ ।
सरकारले भारतसंग जोडिएका नेपालका सिमाहरु झापाको काकडभिट्टा, सिरहाको मार्डर, पर्साको वीरगञ्ज, कपिलबस्तुको कृष्णनगर, कैलालीको गौरीफन्टा, मोरङको रानी, रौतहटको गौर, रुपेन्देहीको बेलहिया, बाकेँको जमुनाह र कञ्चनपुरको गड्डाचौकी नाकाबाट मात्रै नेपालीलाई प्रवेश दिने निर्णय गरेको छ ।
दैनिक उपभोग्य वस्तु लगायत पुर्वाधार निर्माणमा आवश्यक सामग्रीहरु आपुर्ती गर्दा सो कार्यमा संलग्न चालक, सहचालक तथा अन्य व्यक्तीले स्वास्थ्य सुरक्षा सम्बन्धि मापदण्ड पालनामा कमी भएको देखिएकाले स्वास्थ्य सुरक्षा सम्बन्धि मापदण्ड पूर्णरुपमा पालना गर्न प्रशासनले सुचना जारी गरेको छ ।
शैक्षिक संस्थाहरु विद्यालय, कलेज ट्युसन सेन्टर, तालिम केन्द्र लगायत सबै प्रकारका गोष्ठी सेमिनार नगर्न समेत प्रशासनले आग्रह गरेको छ ।