महाकाली नदिबाट हुने अवैध बालुवा उत्खनन् रोकिन्छ : नगर प्रमुख भट्ट

दार्चुला । नेपाल र भारतको सिमा भएर बग्ने महाकाली नदिबाट उत्खनन हुँदै आएको अबैध बालुवा उत्खनन् रोक्ने महाकाली नगरपालिकाका प्रमुख हंसराज भट्टले बताउनु भएको छ ।

सिमा नदि महाकालीबाट दैनिक रुपमा हुँदै आएको नदिजन्य पदार्थ उत्खनन कार्य तत्काल रोकिने उहाको भनाई छ ।

महाकाली नगरपालिका वडा नम्बर ४ बंगाबगड स्थित तटबन्ध क्षेत्रबाट दिनँहु नदि जन्य पदार्थ उत्खनन हुँदै आएको तथा तटबन्ध र सो क्षेत्रका घरहरु जोखिममा पर्न सक्ने सम्भावनालाई मध्यनजर गर्दै बंगाबगड तथा अन्य क्षेत्रबाट हुँदै आएको नदि जन्य पदार्थ उत्खनन् कार्य तत्काल बन्द गरिने उनले बताए ।

बंगाबगडका स्थानियले नगर प्रमुख भट्टलाई भेटेरै बंगाबगड क्षेत्रबाट हुँदै आएको नदि जन्य पदार्थको उत्खनन कार्य तत्काल बन्द गर्न माग समेत गरेका छन् । २०७० सालमा महाकाली नदिमा आएको बाढीले नदि किनारका घर टहराहरु बगाएको थियो । बाढीले तत्कालिन समयमा नदि किनारका घर टहराहरु सबै बगाएपछि नदि किनारमा पक्की तटबन्ध निर्माण गरिएको थियो ।

पुनः महाकालीमा बाढी आउन सक्ने सम्भावनालाई मध्यनजर गरेर निर्माण गरिएको तटबन्द छेउछाउबाटै बालुवा, गिट्टी लगायत नदि जन्य पदार्थ निकाल्दा पुनः जोखिम बढेको छ । प्रत्येक दिन बिहानै देखि नदि किनारबाट नदि जन्य पदार्थ निकाल्ने कार्य अझै रोकिएको छैन् । हुलका हुल आउने महिला, पुरुष र बालबालिकाहरुको समुहले नदि किनारबाट बालुवा निकाल्ने गरेको स्थानियको आरोप छ ।

अहिले सम्म सम्बन्धित निकाय यस विषयमा बेखबर जस्तै बनेको छ । जिल्लालाई पुर्वाधार निर्माणका लागि आवश्यक नदि जन्य पदार्थका लागि टेण्डर खोलि सकिएको भन्दै नगर प्रमुख भट्टले स्थानियले अवैध रुपमा उत्खनन कार्य तत्काल रोक्न निर्देशन भएको बताए ।

बंगाबगड क्षेत्रमा यस अघि बालुवा निकाल्ने क्रममा दुई जना बालक बालुवा निकालेको खाल्डोमा डुबेका थिए, भने दुई दिन पहिले मात्रै तीन जनालाई नदिले बगाएको अवस्थामा उद्दार गरिएको थियो ।