सञ्चारमाध्यममा पहिलोपटक तामाङ भाषा घन्किएको दिन ! कोरोना कहरबीच २६ औं तामाङ प्रसारण दिवस

भर्चुअल माध्यमबाट शुभकामना आदानप्रदान गर्न तामाङ पत्रकार संघको आव्हान

काठमाडौं ।  आज विद्युतिय सञ्चारमाध्यममा पहिलो पटक तामाङ भाषा घन्किएको दिन हो । आज २६ औं तामाङ प्रसारण दिवस हो ।

आजकै दिन अर्थात २०५२ साल भदौ १ गते पहिलोपटक रेडियो नेपालमा तामाङ भाषाको समाचार प्रसारण गरिएको थियो ।

तामाङ भाषाले पहिलोपटक सञ्चारमाध्यममा प्रवेश भएको दिनलाई तामाङ प्रसारण दिवसको रूपमा सम्पुर्ण तामाङ समुदायले  मनाउदै आएको छ ।

सञ्चारमाध्यमहरुले तामाङ भाषाका कार्यक्रम प्रसारण गरी तामाङ भाषाको संरक्षण,संवर्द्धन र प्रवर्द्धन गर्नमा महत्त्वपूर्ण योगदान दिदै आएको छ ।

तामाङ प्रसारण दिवसको अवसरमा तामाङ पत्रकार संघले संस्थागत रूपमा हरेक वर्ष मनाउदै आएकोमा यस वर्षको २६ औं तामाङ प्रसारण दिवसका लागि तय गरिएका सम्पुर्ण कार्यक्रम भने स्थगित गरेको छ ।

तामाङ पत्रकार संघले  हिजो आइतबार एक विज्ञप्ति जारी गर्दै  काठमाडौं उपत्यकासहित मुलुकभर कोरोना भाइरस संक्रमितको संख्या उच्च भइरहेको अवस्थामा बढ्दाे जोखिमलाई  ध्यानमा राखेर कार्यक्रम स्थगित गरिएको जनाएको छ । साथै भर्चुअल माध्यमबाट शुभकामना आदानप्रदान गर्न समेत सबैमा आव्हान गरेको छ ।

विज्ञप्ति मार्फत तामाङ  पत्रकार संघले देश विदेशमा क्रियाशील तामाङ सञ्चारकर्मीहरु,संस्थाका संरक्षक,सल्लाहकार तथा शुभेच्छुक महानुभावहरुका साथै सम्पुर्ण तामाङ समुदायमा २६ औं तामाङ प्रसारण दिवसको हार्दिक शुभकामना व्यक्त गरेको छ ।

www.paharanepal.com  को तर्फबाट २६ औं तामाङ प्रसारण दिवसको अवसरमा सम्पुर्ण सञ्चारकर्मी,समुदाय र शुभचिन्तक महानुभावहरुमा हार्दिक शुभकामना !