दार्चुला
जिल्लाको ब्याँस गाउँपालिकामा खाद्यान्न अभाव भएको छ । अविरल रुपमा भइरहेको वर्षाका कारण दार्चुला तिंकर सडकको ठाउँ ठाउँमा पहिरो खस्दा खाद्यान्न ढुवानी हुन नसके पछि ब्याँस गाउँपालिकाका सबै वडाहरुमा खाद्यान्न अभाव भएको गाउँपालिकाका अध्यक्ष दिलिप सिंह बुढाथोकीले बताए । गाउँपालिकाको वडा नम्बर १ छाङ्गरु र तिंकरमा हेलिकप्टर मार्फत ढुवानी गरिएको चामल मौज्दात रहेको भए पनि नुन, तेल पिठो लगायतका अन्य खाद्य सामाग्री अभाव रहेको उहाले जानकारी दिए । दार्चुला तिंकर सडकको ठाउँ ठाउँमा ठूल–ठुला पहिरो खस्दा सदरमुकाम खलंगाबाट दैनिक रुपमा ढुवानी हुने खाद्यान्न ढुवानी नहुँदा अभाव सिर्जना भएको उहाको भनाई छ ।
विगतका वर्षहरुमा महाकाली नदि माथि लगाइएका तुइन मार्फत भारतबाट केही खाद्यान्न ढुवानी हुने तथा यस वर्ष कोरोना भाइरसका कारण सिमानाकाहरु सबै बन्द हुँदा खाद्यान्न अभाव भएको उहाले बताउनुभयो । दार्चुला तिंकर सडकमा खसेको पहिरो पन्छाउने कार्य हाल सम्म पनि हुन नसक्दा ब्याँसमा खाद्यान्न ढुवानी गर्न नसकिएको स्थानिय व्यापारीले बताएका छन् । विगत लामो समय देखी सडक सुचारु नहुँदा दैनिक रुपमा ब्याँस गाउँपालिकाका लागि ढुवानी हुँदै आएको खाद्यान्न ढुवानी गर्न नसकिएको ब्याँस–६ हुतीका स्थानिय व्यापारी लिलादत्त भट्टले बताए । ‘दार्चुला तिंकर सडकको ठाउँ ठाउँमा खसेको पहिरोका कारण ट्याक्टर संचालन हुन नसकेपछि खाद्यान्न ढुवानी हुन सकेन् उहाले भन्नुभयो ।’
ब्याँस गाउँपालिकाका सबै जसो वडाहरुमा अहिले चामल, दाल, नुन, तेल, पिठो लगायतका खाद्य सामाग्रीहरुको अभाव देखिएको छ । सडकमा खसेको पहिरो हटाउने कार्य हाल सम्म पनि नगरिए पछि मंगलवार ब्याँस गाउँपालिका नेपाल तरुण दल र नेपाल विद्यार्थी संघले दार्चुला तिंकर सडक योजनालाई यथाशाक्य छिटो सडक सुचारु गर्न माग गर्दै ज्ञापन बुझाएका छन् ।
ब्याँस र दुहुँ गाउँपालिकाका जनताले झेली रहेको खाद्यान्न अभाव र भोगी रहेको पिडालाई सम्बोधन गर्न सडक सुचारु गर्न पर्ने माग राख्दै योजनाका निमित्त कार्यालय प्रमुख दिनेश रैखोलालाई ज्ञापन बुझाएको नेपाल तरुण दल ब्याँस गाउँपालिकाका अध्यक्ष नरेन्द्र सिंह विष्टले जानकारी दिनुभयो । यता दार्चुला तिंकर सडक योजनाले ब्याँसमा सिर्जना भएको खाद्यान्न अभावलाई परिपुर्ती गर्न एक हप्ता भित्रै सडक सुचारु गर्ने प्रतिबद्धता जनाएको ब्याँसका स्थानिय दिपक खातीले जानकारी दिए ।
तपाईको प्रतिक्रिया