पुजारीको हत्या घटनाप्रति धार्मिक संगठनको ध्यानाकर्षण

नेपाल सनातन धर्म संस्कृति संगठनले रौतहट जिल्लाको माधावनारायण-०२, खोसरहियामा हनुमान मन्दिरका पुजारी राम शाहको अज्ञात समुहले गोली हानी मारेको घटना प्रति घोर भर्त्सना गरेको छ ।
संगठनले आज एक प्रेस विज्ञप्ति जारी गर्दै उक्त घटनाको दोषीलाई कार्वाहि गर्नको लागि माग समेत गरेको छ। यस्तो अमानविय र निन्दनिय कार्य प्रति प्रतिकार गर्न लागि अव सनातन धार्मिक क्षेत्र संगठित हुनु पर्ने आवस्यकता भएको कुरा विज्ञप्तिमा उल्लेख गरिएको छ।
धार्मिक संगठनले गत श्रावण महिनामा सप्तरी जिल्लामा नरसिंग हिन्दु सेनाका धार्मिक अभियान्ता विष्णु प्रताप शाहलाई विना कारण प्रहरीले हिरासतमा लिएको प्रति समेत खेद प्रकट गरेको छ। अन्याय र अत्याचारको विरूद्धमा आवाज उठाएका शाहलाई केहि राजनीतिक व्यक्तिहरूको षणयन्त्रमा फसाईएको थियो। विष्णु प्रताप शाह भाद्र ४ गते बिहिवार सम्बन्धित जिल्ला अदालत बाट धरौटिमा छुटेका छन।
यो कार्य कुनै एक व्यक्ति प्रति नभई समग्र सनातन धर्मावलंबीहरू प्रति गरिएको प्रहार भएकोले सनातन धर्म रक्षाको लागि सबै संगठित हुनको लागि समेत विज्ञप्तिमा उल्लेख गरेको छ । विगत केहि समय देखि लगातार सनातन धर्म र धार्मिक व्यक्तिहरू माथि प्रहार भईरहेकोले धर्म रक्षार्थ सबै सनातनीलाई संगठित गर्न तयारी गरिरहेको धार्मिक संगठनका प्रमुख योगी पुष्पराज पुरूषले विज्ञप्तिमा उल्लेख गरेका छन । संगठनले विज्ञप्तिमा सनातन धार्मिक समाज सुरक्षित नभएको भन्दै नेपालका सबै धार्मिक संघसंस्था,मठ मन्दिर,गुठि,गुम्वा लगायत सबैलाई संगठित हुनको लागि समेत आग्रह गरेको छ l