नेकपा विवाद समाधानका लागि गठित कार्यदलले ओली-प्रचण्डलाई प्रतिवेदन बुझायो, यस्तो छ सहमति

काठमाडौं । सत्तारुढ नेपाल कम्युनिस्ट पार्टी (नेकपा) को जारी विवाद समाधानका लागि गठित कार्यदलले अध्यक्षद्वयलाई प्रतिवेदन बुझाएको छ ।

कार्यदलले साँझ प्रधानमन्त्री तथा अध्यक्ष केपी शर्मा ओली र अर्का अध्यक्ष पुष्पकमल दाहाल प्रचण्डलाई प्रतिवेदन बुझाएको हो ।

अध्यक्षद्वय ओली र प्रचण्डले पार्टीभित्रको बिवाद समाधानका लागि सुझाव दिन साउन ३० गते महासचिव बिष्णु पौडेलको नेतृत्वमा ६ गठन गरेको कार्यदलले एक सातामै सर्वसम्मत रुपमा प्रतिवेदन तयार गरी अध्यक्षद्वयलाई बुझाएको हो ।

कार्यदलले अध्यक्षद्वयको कार्यबिभाजन गर्दै पार्टी र सरकार एकअर्काबीच समन्वय र सुझावका आधारमा अघि बढाउने गरी दुई अध्यक्षबीचमा भएका सहमतिलाई प्रतिवेदनमा किटानी गरेको छ ।

पार्टीलाई विधिसम्मत रुपमा संचालन गर्नुपर्ने भन्ने एजेण्डाबाट अघि बढेको विवादलाई दुई अध्यक्षबीचको सहमती र साझेदारीलाई स्पष्ट परिभाषित गरिदिएपछि औपचारिक रुपमै टुंगो लाग्ने संकेत देखिएको छ ।

नेकपा विवाद समाधान जस्तै देखिए पनि पार्टी संस्थागत जानेभन्दा झन् दुई अध्यक्ष बलियो भएको एक सचिवालय सदस्यले बताउनुभयो ।

कार्यदलले एकता महाधिवेशनअघि पार्टीले गर्नुपर्ने सबै काममा दुई अध्यक्षको व्यवस्थापन र सहमतिलाई केन्द्रमा राख्दै प्रतिवेदन बुझाएको छ ।

कार्यदलमा महासचिव विष्णु पौडेल संयोजक तथा स्थायी कमिटीका नेताहरु शंकर पोखरेल, सुरेन्द्र पाण्डे, भीम रावल, जनार्दन शर्मा र पम्फा भुसाल सदस्य हुनुहुन्थ्यो ।