१५ दिन कर्फ़्यू लगाउन सुझाव दिने मेयर उपमेयरहरुको तलब भत्ता बन्द गर्न व्यवसायीहरुको माग

काठमाडौं । व्यवसायीहरुले १५ दिन कर्फ़्यू लगाउन सुझाव दिने काठमाडौंका मेयर उपमेयरहरुको तलब भत्ता बन्द गर्न सुझाव दिएका छन् ।

चैतदेखिको तीन महिना लामो लकडाउन र त्यसपछिको निषेधाज्ञाले अर्थतन्त्र थिलोथिलो भएको अवस्थामा फेरि १५ दिन कर्फ़्यू लगाउन उपत्यका नगरपापालिका फोरमले सुझाव दिएपछि व्यवसायी रुष्ट भएका हुन् ।

फोरमको बुधबारको बैठकले कोरोना महामारी नियन्त्रणमा आउनुको सट्टा बढ्ने क्रम जारी रहेको भन्दै १५ दिन कफ्र्यु लगाउन सरकारलाई सुझाव दिएको थियो ।
फोरममा उपत्यकाका १८ वटै पालिकाका प्रमुख र उपप्रमुख आबद्ध छन् । फोरमका सचिव मदनसुन्दर श्रेष्ठले भने, ‘अहिलेसम्मको नतिजा हेर्दा सङ्क्रमण बढ्दै गएको देखिन्छ, त्यसैले हामीले अर्को एक हप्ता थप कडाइ गर्न सुझाव दिएका छौं ।’

उनका अनुसार सर्वसाधारणले निषेधाज्ञाको पूर्ण पालना गरिरहेका छैनन् । त्यसैले नियन्त्रण हुन सकेको छैन । उपत्यकाका धेरै जनप्रतिनिधि नागरिकले निषेधाज्ञा पलना नगरेको भन्दै कफ्र्य नै लगाउनु पर्ने पक्षमा देखिएका छन् ।

निषेधाज्ञाको समयमा जानाजान घुमफिरमा निस्कने जमात बढिरहेको छ । तरकारी तथा फलफूल बजारमा सामाजिक दूरी कायम हुन सकिरहेको छैन । प्रहरीले समेत प्रभावकारी भूमिका निर्वाह गर्न सकिरहेको छैन ।

आफैं सङ्क्रमित भएकाले न्यून संख्याका प्रहरीले सुरक्षा दिइरहनुपरेको छ । जबरजस्ती गाडी चलाउने क्रम रोकिएको छैन । दुई हप्ताको अन्तरालमा उपत्यकाका यसरी आदेश उल्लंघन गर्ने झण्डै १० हजार गाडी कारवाहीमा परिसकेको छ ।
काठमाडौं उपत्यकाभित्रका मेयरहरुको संस्थाको बैठकमा मेयरहरु उपस्थित नहुँदा उपमेयरहरुले प्रतिनिधित्व गर्छन् ।
 व्यवसायी प्रवलजंग पाण्डेले फोरमको सुझावप्रति आलोचना जनाउँदै सामाजिक सञ्जालमा लेखेको प्रतिक्रियामा अर्का व्यवसायी विप्लवमान सिंहले कर्फ़्यू लगाउन सुझाव दिने काठमाडौंका मेयरहरुको तलब भत्ता बन्द गर्नुपर्ने जनाएका हुन् । सिंह लेख्छन्, ‘यिनीहरू पागल हुन् । यिनीहरूको तलब भत्तापनि रोक्नु पर्छ । अनि थाहा हुन्छ लकडाउन के हो ? भनेर ।

व्यवसायी प्रवलजंग पाण्डेले १५ दिन कर्फ़्यू लगाउन सुझाव दिने नगरपालिका फ़ोरमले अधिल्लो १४ दिनको सटडाउनमा कोभिड नियन्त्रणमा के गर्यो ? भनी प्रश्न गरेका छन् ।