दार्चुलाको शैल्यशिखर र मार्माका अधिकांस ठाउँहरु शिल

दार्चुला : कोरोना संक्रमण बढदै गईरहेको समयमा दार्चुलाको शैल्यशिखर नगरपालिका र मार्मा गाउँपालिकाका अधिकांस ठाउँहरुमा निषेधाज्ञा जारी गरिएको छ । शुक्रवार मार्मा गाउँपालिकामा कार्यरत चिकित्सकमा कोरोना पुष्टि भएसंगै शैल्यशिखर र मार्माका अधिकांस ठाउँहरुमा निषेधाज्ञा गरिएको हो ।
शनिवार कोरोना पुष्टि भएका मार्मा गाउँपालिकामा कार्यरत चिकित्सक भदौ १८ गते शैल्यशिखर नगरपालिका स्थित गोकुलेश्वर अस्पतालमा विरामीको अवस्था बुझ्न गएकाले कोरोना भाइरस समुदायमा फैलिन सक्ने सम्भावनालाई मध्यनजर गर्दै शैल्यशिखर र मार्माका ठाउँहरुमा साढे ६ बजेदेखि अर्को सूचना जारी नभएसम्मका लागि निषेधाज्ञा जारी गरिएको प्रमुख जिल्ला अधिकारी शरद कुमार पोखरेलले जानकारी दिए ।
नगरपालिकाको सिफारिस अनुसार निषेधाज्ञा नगरपालिकाकाले वडा नम्बर ९ को गोकुलेश्वर बजार र बजारको पश्चिममा रहेको जगतपुरी धाम, उत्तरमा भोलिया इलाका प्र्रहरी कार्यालय मोड, दक्षिणमा चमेलिया नदिको पक्की पुलमा गरिएको छ ।
यस्तै कठपते, गाजरी, धारीगाड खोला, वडा नम्बर ३ को कर्कले देखी उत्तर सुन्दरपुर सम्मको लुइटा र ओसप गाउँ रहेका छन् । मार्मा गाउँपालिकाको वडा नम्बर २ र ३ को लटिनाथ बजार, बिटुले, भैसेबगर, चिउरानी, सिमार, सेलविसा र वडा नम्बर १ को पारीबगर, वडा नम्बर ४ को वडा कार्यालयर स्वास्थ्य चौकी आसपासको रेला बजार क्षेत्रमा अर्को सूचना जारी नभएसम्मका लागि निषेधाज्ञा जारी गरिएको प्रजिअ पोखरेलले बताए ।