दार्चुला :
ब्याँस गाउँपालिकाका उपाध्यक्ष एवं कार्यवाहक अध्यक्ष हेमा भट्ट जोशीले आफूमाथि हातपात भएको भन्दै जिल्ला प्रहरी कार्यालय दार्चुलामा उजुरी दिएकी छन् । सोमवार गाउँकार्यपालिकाको बैठक चलिरहेको समयमा आफूमाथि ब्याँस —४ का नारद दत्त भट्ट, जयलाल सिंह विष्ट र पान सिंह कुँवरले सुनियोजित ढंगबाट हातपात गरेको भन्दै उनीविरुद्ध प्रहरीमा जाहेरी दिएकी हुन् ।
सोमवार कार्यपालिकाको बैठक बसी रहेका बेला हुलका हुल आएका उनीहरुले आफूहरु तालाबन्दी गर्न आएको भन्दै जनप्रतिनिधिहरुलाई बैठक हलबाट बाहिर जान भनेको तथा नगएपछि हातपात गरेको उपाध्यक्ष भट्टले जानकारी दिनुभयो । ब्याँस गाउँपालिका —३ सिनाका जनप्रतिनिधि र स्थानीयहरुले वडामा विनियोजित योजनाहरु गाउँपालिकाले शिर्षक परिवर्तन गरेर रकमान्तर गरेको भन्दै गाउँपालिकामा तालाबन्दी गर्दै आएका छन् ।
भदौ २६ गते वडा नम्बर ३ का वडा अध्यक्ष उपेन्द्र सिंह धामी सहितको टोलीले गाउँपालिकाले वडाको बजेट शिर्षक परिवर्तन गरी रकमान्तर गरेको भन्दै गाउँपालिकाको कार्यालयमा तालाबन्दी गरेका थिए । वडा अध्यक्ष सहितको समुहले लगाएको ताला अर्को दिन वडा नम्बर ३ कै महिलाहरुले खुलाएका थिए । ताला लगाउने समुह संग छलफल नै नगरी आफ्ना दल निकटका महिलाहरुद्धारा ताला खुलाइएको भन्दै नेकपा ब्याँस गाउँ कमिटिका पदाधिकारीहरु नै गएर सोमवार पुनः तालाबन्दी गरेका छन् ।
उनीहरुले गरेको तालाबन्दी खुल्न नसक्दा सेवाग्राहीहरु मर्कामा परेको गाउँपालिकाले जनाएको छ । गाउँपालिकामा तालाबन्दी गर्ने समुहले वडा नम्बर ३ सिनामा वडाबाट छनौट भई स्वीकृत भइसकेका योजनाहरुलाई गाउँपालिकाले शीर्षक परिवर्तन गरि रकमान्तर गर्ने निर्णय फिर्ता गर्नु पर्ने, कोरोनाको बेला भएको हिसाब सार्वजनिक गर्नुपर्ने, लगायतका मागहरु राख्दै आइरहेका छन् ।
तपाईको प्रतिक्रिया