खलंगा नाकाबाट ३५ जना नेपाल भित्रिए

दार्चुला :

दार्चुला सदरमुकामको खलंगाको नाका भएर दार्चुलाका ३० सहित ३५ जना नेपाल भित्रिएका छन् । कोरोनाका कारण सिमानाका बन्द हुँदा लामो समय देखि भारतका विभिन्न ठाउँमा मजदुरी गर्न गएका नेपालीहरुलाई नेपाल प्रवेश दिइएको प्रमुख जिल्ला अधिकारी शरदकुमार पोखरेलले जानकारी दिए ।
दुवै देशको प्रशासन बिच भएको समन्वयका आधारमा विहीवार दिउँसो ३ बजे खलंगा स्थित नेपाल–भारत जोड्ने झोलुंगे पुल खुलाएर उनीहरुलाई नेपाल प्रवेश दिइएको उहाले बताए । पिथौरागढ जिल्लाको डिडिहाट, पिथौरागढ, धारचुला लगायतका क्षेत्रहरुबाट आएका उनीहरुलाई नेपाल प्रवेश दिइ सम्बन्धित जिल्ला पठाइएको हो ।
मुन्स्यारीबाट पुल बन्द भएपछि भारतको धारचुला पुगेका १३ जना भने उतै फसेका छन् । पुल खुल्ने जानकारी ढिलो पाएपछि उनीहरु आउन ढिलो भएको हो । १३ जना नेपाली नागरिक भारतको धारचुलामा रहेको प्रमुख जिल्ला अधिकारी संग जानकारी आएको तथा उनीहरुलाई नेपाल प्रवेश दिने बारे पहल भइरहेको बुझिएको छ । उनीहरुलाई एक दुई दिन भित्रै नेपाल प्रवेश दिने तयारी भइरहेको छ । विहीवार दार्चुला जिल्लाका मार्मा, ब्याँस, मालिकार्जुन, नौगाड गाउँपालिका र महाकाली नगरपालिकाका गरी ३० जना भित्रिएका छन्, भने बैतडी जिल्लाका पुर्चौडी नगरपालिका र डिलाशैनी गाउँपालिकाका ३ र कालीकोट जिल्लाका २ जना गरी जम्मा ३५ जना भित्रिएको उहाको भनाई छ । भारतबाट ३५ जनाले नेपाल प्रवेश गरेका छन्, भने नेपालबाट ३० जना भारत गएको जिल्ला प्रशासन कार्यालय दार्चुलाले जनाएको छ ।
कोरोना भाइरसको संक्रमण फैलिन नदिन बन्द गरिएको सिमा पुल दुवै देशका प्रशासन बिचको समन्वयमा समय–समयमा खोली भारतमा अलपत्र परेका नेपाली नागरिक र नेपालमा अलपत्र परेका भारतीय नागरिकलाई प्रवेश दिइदै आएको छ । नेपाल भित्रिएका उनीहरुलाई बिना चेकजाँच आ–आफ्नो घर पठाइएको छ ।