नेपालमा आएको रेल पुनः भारत तर्फ नै फिर्ता

जनकपुर
नेपालमा आएको रेल पुनः भारत तर्फ नै फिर्ता लगिएको छ । सरकारले डेढ वर्ष देखि निर्माणाधीन जनकपुर–जयनगर रेलमार्गमा रेल सञ्चालन गर्ने घोषणा गरे पनि आवश्यक पूर्व तयारीमा चुक्दा भारत तर्फ नै फिर्ता लगिएको हो । नियमित रूपमा रेल सञ्चालन गर्न डेढ महिना जति लाग्ने नेपाल रेलवे कम्पनीले बताएको छ ।
३४ किलोमीटर लामो रेलमार्गमा शुक्रवार परीक्षण गरिए पनि नेपालले आवश्यक जनशक्ति तयार नगर्दा दुईओटा रेलसेटहरू पुनः भारत तर्फ नै लगिएका हुन् ।
सो रेलमार्गमा रेल सञ्चालनका लागि आवश्यक प्राविधिक तथा प्रशासनिक कर्मचारीहरू भर्ना नगरिएको तथा रेल इन्जिनीयरहरू भारतबाट ल्याउने प्रक्रिया नटुङ्ग्याउँदा नयाँ रेल आए पनि सेवा सञ्चालन हुन सकेको छैन ।
नेपाल रेलवे कम्पनी लिमिटेडले १३९ कर्मचारी नियुक्ति गर्न भदौ २९ गते सूचना जारी गरेको छ । करार सेवाका लागि कम्पनीले १५ दिन भित्र आवेदन माग गरिएको छ । यसको प्रक्रिया सम्पन्न गर्न डेढ देखि २ महिना जती समय लाग्ने छ ।
भारतबाट ल्याउने कर्मचारीका लागि भने १ हप्ता भित्र टुंगो लाग्ने कम्पनीका महाप्रबन्धक गुरु भट्टराईले जानकारी दिए । उनका अनुसार लामो समय रेल सञ्चालन नगरी राखे पार्टपुर्जा बिग्रन सक्छ ।
‘सञ्चालनमा ल्याइसकेको रेल पार्किङ गरेर राख्दा पार्टपुर्जा बिग्रन सक्ने भए पछि समय–समयमा चलाउन पुनः जयनगर नै पठाउनु परेको हो,’ उनले भने, ‘अहिले जयनगर र धनुषाको इनरुवामा ल्याएर राख्ने कि भन्ने विषयमा छलफल भइरहेको छ ।’ नियमित रूपमा रेल सञ्चालन गर्न डेढ महिना जति लाग्ने भट्टराईले बताए ।