नवलपरासीमा बाढीको त्रास ! दर्जनौ घर डुबानमा

-सहबान अन्सारी

नवलपरासीमा बिहिवार रातिदेखी लगातार अबिरल बर्षाको कारण  सरावल गाउँपालिका वडा नं. ५ ,६, ७ र पाल्हीनन्दन गाउँपालिका–१, शंकरपुर जलमग्न भएका छन् ।

वर्षाको पानीले निकास नपाउँदा गाउँहरु डुबानमा  हुदा स्थानीयले सास्ती भाेग्न परेको छ ।

यसै गरी   सरावलकाे वडा नं. ६ मा करिब ३० घर तथा वडा नं. ७ मा १५ घर बिस्थापित भएको स्थानीय घनश्याम चाैधरीले जानकारी दिए।जनप्रतिनिधिहरुले दीर्घकालीन समाधानको उपाय नअपनाउँदा हामी सधैंभरि बाढीको त्रासमा बस्नुपरेको चाैधरीले बताए।

गाउँ तथा बाटोमा पनि घुँडाभन्दा माथि पानी पुगेकाले स्थानीय समस्यामा परेका छन् । भेल पसेर धान बाली पुरिएको छ । घरभित्र पानी पस्दा अन्न र पशुचौपाया जोगाउन धौधौ परेको सरावल ६ की सिन्धुलि कुर्मीले बताईन।

 करिब ३ दिन देखी बाढी गाउँघरमा पसेको पनि समस्या बुझ्न  कुनैपनि जनप्रतिनिधि नअाएकाे र सम्बन्धित वडाध्यक्षलाई सम्पर्क गर्दा म के गर्न सक्छु र ? जवाफ दिने गरेको सोही ठाँउ बस्ने मैनुद्दिन चुरिहार बताउछन ।

 गाउँमा पानीको कारणले गर्दा  बिषालु सर्प तथा किरा फट्याङ्ग्रा बढेकाे र १ जनालाई सर्पले टोकेको  लक्ष्मिकान्त चाैधरीले बताए। 

लगातार बर्षाको कारण पानीको बहाव बढ्दै गएपछि अासपासका मानिसहरु त्रसित भएका छन ।

जिल्लाको प्रतापपुर, सरावल ,पाल्हिनन्दन र सुस्ता गाउँपालिका बासिन्दाहरु सधैं बाढी र प्राकृतिक विपद्को जोखिममा रहेका छन् ।