दार्चुला‐ जिल्लाको महाकाली नगरपालिकाका नौ वटै वडाहरुलाई सोमबार एक कार्यक्रमका बिच पुर्ण खोप सुनिश्चितता तथा दिगोपना वडा घोषणा गरिएको छ । सबै वडाका १२ देखी २३ महिना सम्मका २ सय ४९ बालबालिकाले राष्ट्रिय खोप तालिका अनुसारका सम्पुर्ण खोपहरु पुरा प्राप्त गरे संगै वडाहरुलाई पुर्ण खोप सुनिश्चितता तथा दिगोपना वडा घोषणा गरिएकोे स्वास्थ्य शाखा प्रमुख लालजिरा भट्टले जानकारी दिनुभयो ।
वडाहरुलाई पुर्ण खोप सुनिश्चितता तथा दिगोपना घोषणा गरिए संगै नगरपालिकालाई पुर्ण खोप सुनिश्चितता तथा दिगोपना घोषणाका लागी जिल्ला खोप समन्वय समितिलाई सिफारिस गरिएको उहाले बताउनुभयो । नौ वटै वडाका वडा अध्यक्षहरुलाई नगर प्रमुख हंसराज भट्टले प्रमाण पत्र प्रदान गर्दै वडा पुर्ण खोप सुनिश्चितता तथा दिगोपना भएको घोषणा गर्नु भएको हो ।
नगरपालिका भित्र १७ वटा खोप केन्द्रहरु रहेका छन् । कार्यक्रममा उपस्थित नगर क्षेत्र भित्रका विभिन्न स्वास्थ्य चौकीका प्रमुख, बर्थिङमा कार्यरत अनमी र खोप कार्यकर्ताहरुले स्वास्थ्य क्षेत्रका समस्याहरु दर्साउनु भएको थियो । हाल संचालनमा रहेका बर्थिङ सेन्टर, खोपकेन्द्र र स्वास्थ्य चौकीका समस्यालाई नगर प्रमुख भट्ट समक्ष राख्दै समस्या समाधानका लागी आग्रह गर्नु भएको छ । उनिहरुले भौतिक संरचना, औषधी, सरसफाई र खानेपानी लगायतका समस्याहरु राखेका थिए । कार्यक्रममा स्वास्थ्यकर्मीहरुले राखेका समस्या समाधानका लागी नगर प्रमुख भट्टले स्वास्थ्य शाखालाई निर्देशन दिनुभएको छ ।
साथै उहाले स्वास्थ्य क्षेत्रमा रहेका समस्याहरु मध्ये नगरपालिका स्थापना भइसकेपछि धेरै जसो समस्या समाधान भएको समेत बताउनुभयो । कार्यक्रममा नगर प्रमुख भट्टले नगर क्षेत्र भित्रका स्वास्थ्य संस्थाहरुमा पठाइने औषधीको म्याद सकिने मिति दुई वर्ष भन्दा कम भएका खरिद नगर्न पनि स्वास्थ्य शाखालाई निर्देशन गर्नु भएको छ ।
कार्यक्रममा नगर क्षेत्र भित्र संचालनमा रहेका विभिन्न स्वास्थ्य चौकी प्रमुख, बर्थिङ सेन्टरमा कार्यरत अनमी, खोप कार्यकर्ता लगायत विभिन्न वडाका जनप्रतिनिधि लगायत पत्रकारहरुको उपस्थिति रहेको थियो । कार्यक्रम नगरपालिकाको हलमा सम्पन्न भएको हो ।
तपाईको प्रतिक्रिया