पशुसेवा विज्ञ केन्द्र र कृषि ज्ञान केन्द्र दार्चुलामा पनि स्थापना

दार्चुला / भेटेरिनरी अस्पताल तथा पशुसेवा विज्ञ केन्द्र र कृषि ज्ञान केन्द्र दार्चुला जिल्लामा पनि स्थापना गरिएका छन् ।

प्रदेश सरकारको मन्त्रीपरिषद्को बैठकको निर्णय अनुसार दार्चुला सहित सुदूरपश्चिमका ९ वटै जिल्लामा भेटेरीनरी अस्पताल तथा पशुसेवा विज्ञ केन्द्र र कृषि ज्ञान केन्द्र स्थापना गरिएको हो ।

यसअघि दार्चुला र बैतडी दुबै जिल्ला कृषि ज्ञान केन्द्र बैतडीले हेर्ने गरेको थियो । दुवै जिल्लालाई एकै जिल्लाबाट हेर्न असहज हुन थालेपछि दार्चुलामा पनि कार्यालय स्थापना गरिएको पशु विकास अधिकृत खेमराज भट्टले जानकारी दिए।

यसअघि सुदूरपश्चिम प्रदेशका पाचँ जिल्ला बैतडी, डडेल्धुरा, कञ्चनपुर, बाजुरा र बझाङमा भेटेरिनरी अस्पताल तथा पशुसेवा विज्ञ केन्द्र स्थापना गरिएका थिए ।

शुक्रवार दार्चुला कैलाली, डोटी, र अछाममा नयाँ भेटेरिनरी विज्ञ केन्द्र स्थापना गरिएको हो । तत्काल मन्त्रालयकै कर्मचारीबाट विज्ञ केन्द्र र ज्ञान केन्द्र व्यवस्थापन गरी सेवा प्रदान गरिने भएको छ ।