जडिबुटीमा सबैभन्दा बढी तेजपात निकासी, ५ लाख बढी राजश्व संकलन

दार्चुला । डिभिजन वन कार्यालय दार्चुलाले पत्रकारहरु संग अन्तक्र्रिया कार्यक्रम सम्पन्न गरेको छ । आइतवार सम्पन्न अन्तक्र्रिया कार्यक्रममा डिभिजन वन कार्यालय दार्चुलाको वार्षिक समिक्षा समेत गरिएको हो । साविकका २० गाविस समेटिएको वन क्षेत्रमा १७० ओटा सामुदायिक वन रहेका छन् । गत आर्थिक वर्षमा डिभिजन वन कार्यालय दार्चुलाले ५ सामुदायिक वन गठन गरेको छ भने १० कार्ययोजना तयार पारेको डिभिजन वन अधिकृत गोकुल रिजालले जानकारी दिए । डिभिजन वन अधिकृत रिजालका अनुसार कार्यालयले विभिन्न कार्यक्रम अघि सारेको छ । सामुदायिक वन व्यवस्थापन र प्रवद्धन कार्यक्रम, नर्सरी व्यवस्थापन कार्यक्रम, वन पैदावार वन्यजन्तु सिकार नियन्त्रण, वन डडेलो नियन्त्रण, पर्यापर्यटन रहेको छ । नर्सरी व्यवस्थापन कार्यक्रम अन्तर्गत जिल्लाका तीन ठाउँमा नर्सरी स्थापन गरिएका छन्् । शैल्यशिखर नगरपालिकाको गोकुलेश्वर, मालिकार्जुन गाउँपालिकाको जौलजीवी र महाकाली नगरपालिकाको धापमा नर्सरी स्थापना गरिएको रिजालले बताउनु भयो । यस्तै विभिन्न ठाउँमा १ लाख विरुवा रोपिएको उहाले बताए । वन कार्यालयमा २ मुद्धा दर्ता भएका छन् । एम्वुलेन्समा चितुवा ओसार पसार तथा सालको काठ ओसारपसारमा दुई जनाविरुद्ध मुद्धा दर्ता गरिएको हो । प्लाष्टिक झोलामुक्त कार्यक्रम अन्तर्गत कार्यालयले कपडाको झोला वितरण गरेको छ ।

यस्तै कार्यालयले वन्यजन्तु व्यवस्थापन कार्यक्रम अन्तर्गत दुई जनालाई नगद राहात उपलब्ध गराएको छ । भालुको आक्रमणबाट घाइते भएका नौगाड गाउँपालिकाका मठीराम कामीलाई एक लाख राहत स्वरुप उपलब्ध गराइएको छ भने चितुवाले गोरु मारेको महाकाली नगरपालिकाका वडा नम्बर ५ का जयसिह बोहरालाई १८ हजार अनुदान स्वरुप प्रदान गरिएको जनाईएको छ । वन कार्यालयले जिल्लाबाट सबैभन्दा बढी तेजपात निकासी भएको जनाएको छ । जडिवुटी अन्तर्गत झण्डै १ लाख किलाग्राम तेजपात निकासी भएको अधिकृत रिजालले बताए । आर्थिक वर्षमा वन कार्यालयले ५ लाख २२ हजार ५० रुपैया राजस्व संकलन गरेको छ । कार्यालयले ७४ प्रतिशत वित्तिय प्रगति तथा ७६ दशमलव ९१ प्रतिशत भौतिक प्रगति हासिल गरेको जनाएको छ ।