दार्चुला । नेपालका पहिलो जननिर्वाचित प्रधानमन्त्री तथा नेपाली काँग्रेसका संस्थापक नेता विश्वेश्वरप्रसाद कोइराला (बीपि) को ३८ औं स्मृति दिवस दार्चुलामा पनि मनाइएको छ । नेपाली कांग्रेस जिल्ला कार्यसमिति दार्चुलाले आयोजना गरेको कार्यक्रममा बीपि कोइरालाको फोटोमा माल्यार्पण गरी स्मृति दिवस मनाइएको हो ।
कार्यक्रममा बोल्दै नेपाली कांग्रेस दार्चुलाका नेता विक्रम सिंह धामीले सबै कांग्रेसीहरुले बिपि कोइरालाले अंगिकार गरेका सिद्धान्तलाई आत्मसाथ गर्नु पर्नेमा जोड दिनुभयो । अर्को प्रसंगमा बोल्दै नेता धामीले गुट उपगुट बिपि सिद्धान्तमा नभएको भन्दै नेपाली कांग्रेस एक भएर अघि बढ्नु पर्ने बेला आएको बताउनुभयो । यस्तै उपसभापति ललित सिंह ठगुन्नाले बिपि कोइरालाका सिद्धान्त मुलमान्यतालाई सबैले मनन गर्नुपर्ने बताउनुभयो ।
कार्यक्रममा जिल्ला समन्वय समितिका प्रमुख एवं कांग्रेस नेता करविर बहादुर कार्कीले लोकतन्त्रका संस्थापक बिपि कोइराला भएको बताए । विभिन्न जातजाती, भेषभुषा, धर्म संस्कृति मान्दै आएका नेपाली सबै एक हुन भन्ने बिपिको मान्यता रहेको उहाको भनाई थियो । कोइराला २०१५ सालको आमचुनावमा कांग्रेसले दुई तिहाइ बहुमत ल्याएपछि पहिलो जननिर्वाचित प्रधानमन्त्री बन्नुभएको थियो । उहाँले नेपालमा राष्ट्रियता, प्रजातन्त्र र समाजवाद स्थापनाका लागि राजनीतिक नेतृत्व दिनुभएको थियो ।
तर दुई वर्ष काम गर्न नपाउँदै तत्कालीन राजा महेन्द्रले जननिर्वाचित संसद् अपदस्त गरेपछि उहाँले लामो समय निर्वासन र जेलमा बिताउनु परेको थियो । पछि उँहा विदेशमा बसेर देशका लागि लड्नु भन्दा देशभित्रकै सबै शक्तिबीचको एकता महत्वपूर्ण हुने भन्दै राष्ट्रिय मेलमिलापको नीति लिएर स्वदेश फर्किनु भएको थियो । उहाँले प्रवद्र्धन गरेको प्रजातान्त्रिक समाजवाद र मेलमिलापको नीति अहिले पनि सान्दर्भिक मानिन्छ । कोइरालाको २०३९ साउन ६ गते निधन भएको थियो । नेपालमा राणा शासन अन्त्य गरी प्रजातन्त्र स्थापनामा नेतृत्वदायी भूमिका निर्वाह गरेका कोइरालाले नेपाली राजनीति र समाजलाई दुरगामी महत्वको दर्शन प्रतिपादन गर्नु भएको थियो । कार्यक्रम जिल्ला सभापति ललित सिंह बोहराको अध्यक्षतामा भएको हो ।
तरुण दल र नेविसंघद्धारा अस्पतालका बिरामीलाई फलफुल वितरण
नेपाली काँग्रेसको भातृ संगठन नेपाल तरुण दल र नेपाल विद्यार्थी संघ दार्चुलाले अस्पतालमा रहेका विरामीहरुलाई फलफुल वितरण गरेको छ । प्रथम जननिर्वाचित प्रधानमन्त्री एवं काँग्रेसका संस्थापक नेता बिपी कोइरालाको ३८ औँ स्मृति दिवसको अवसरमा फलफुल वितरण गरिएको हो । दिवसको अवसरमा बीपी कोइरालाको तस्बिरमा माल्यार्पण गरी जिल्ला अस्पतालका २५ जना बिरामीलाई फलफुल वितरण गरिएको नेविसंघ जिल्ला सदस्य सुरज जोशीले जानकारी दिए । फलफुल वितरण कार्यक्रममा तरुण दलका जिल्ला अध्यक्ष सुरेन्द्र बम, नेविसंघ सचिव हरी जोशी लगायत विद्यार्थी नेताहरुको सहभागिता रहेको थियो ।
तपाईको प्रतिक्रिया