बाढीले महाकाली नगरपालिकाका ६ आरसिसि पुल बगायो

दार्चुला । लगातार परेको बर्षाका कारण महाकाली नगरपालिकाका विभिन्न खोलाहरुमा आएका बाढी र पहिरोले ६ वटा आरसिसि पुल बगाएको छ । केहि गत आर्थिक वर्ष २०७६/०७७ र केहि त्यो भन्दा अर्को आर्थिक वर्षमा निर्माण गरिएका आरसिसि पुल बगाएको महाकाली नगरपालिका विपद व्यवस्थापन शाखाले जनाएको छ ।

साउन ४ गते खोलाहरुमा आएको बाढीले महाकाली नगरपालिकाको वडा नम्बर २ मा रहेको एगरमोरे, जौली, आरसिसि पुल, वडा नम्बर ३ मा रहेको मानाकोट आरसिसि पुल, गाराकु, बडालीगाउँ र गाराकुमानाकोट आरसिसि पुल बगाएको हो । बाढीले सिचाँई कुलो, विद्यालय घेर पर्खाल, पानी मुहान, ७ वटा पानी घट्ट, ३ वटा काठेपुल, र घोरेटो बाटो समेत बगाएको छ । नगरपालिकाको वडा नम्बर १ मा पर्ने श्रीबगडमा माथीबाट खसेको पहिरोले एक घर पुर्णरुपमा क्षति गरेको छ । सोही दिन लास्कु खोलामा आएको बाढीले नगरपालिका क्षेत्र भित्र १ मोटरसाइकल र १ जिप समेत बगाएको छ ।

 बाढीले हालसम्म नगरपालिका क्षेत्र भित्रमा गरेको प्रारम्भिक क्षति अनुसार २८ लाख १५ हजार बराबरको क्षति भएको नगरपालिकाले जनाएको छ । बाढीले खानेपानीको मुल र पाइपहरु ब्गाउदा खलंगामा ३ दिन देखी खानेपानीको हाहाकार भएको छ । खासगरी नगरपालिकाको वडा नम्बर ४ बजार क्षेत्रमा ३ दिन सम्म धारामा खानेपानी नआउदा निकै समस्या भएको छ । धारामा पानी नआउदा खलंगामा बसोबास गर्ने सबै जसो मानिसहरु निकै टाढा टाढा गएर पानी बोक्न बाध्य छन् ।

यता खानेपानी आपुर्ती गरिरहेको खलंगा खानेपानी उपभोक्ता समितिले बाढीले बगाएको पानी मुहान र पाइप लाइन मर्मत कार्य भइरहेको जनाएको छ । विगतमा दिनमा ३ पटक आउने खानेपानी अहिले एक पटक पनि नआएपछि उपभोक्ता मारमा परेका छन् । बाढीले क्षति पुर्याएको खानेपानी मुहान र पाइप लाइनहरु यथाशिघ्र मर्मत गरी खानेपानी आपुर्ती सहज बनाउने तिर सम्बन्धित निकायको ध्यान जानु अति आवश्यक छ ।