पहिरोबाट विस्थापित ३४ घरपरिवारको पुर्नःस्थापनाका लागी प्रदेश सरकारलाई सिफारिस

दार्चुला। जिल्लाको ब्याँस गाउँपालिका–३ तुसरपानीका बाढी र पहिरोका कारण विस्थापित भएका ३४ घरपरिवारको पुर्नःस्थापनाका लागी सुदुरपश्चिम प्रदेश अर्थ विकास तथा स्रोत समितिलाई सिफारिस गरिएको छ ।

प्रदेश सरकार मार्फत संचालनमा रहेका योजनाहरु अनुगमन गर्न दार्चुला पुगेको   सुदूरपश्चिम प्रदेश सभाको अर्थ विकास तथा प्राकृतिक स्रोत समितिको टोलीलाई वडा अध्यक्ष उपेन्द्र सिंह धामीले बाढी र पहिरोका कारण विस्थापित तुसरपानीका ३४ घरपरिवारको पुर्नःस्थापनाका लागी समितिका अध्यक्ष दिर्घ सोडारीलाई सिफारिस साथ अनुरोध पत्र बुझाउनु भएको हो ।

साउन २० गते राती बस्ती माथी बाट खसेको पहिरोले तुसरपानीका ३४ घर उच्च जोखिममा रहेको वडा अध्यक्ष धामीले बताउनुभयो । उक्त बस्तीका परिवारहरुलाई अहिले नजिकैको छिमेकी गाउँमा सारिएको छ । यस अघि भदौ ७ गते ब्याँस गाउँपालिकाले २९ परिवारलाई  जस्तापाता र ग्यास सिलेण्डर वितरण गरेको थियो ।

पूर्व सामाजिक मन्त्री एवं प्रदेश सभा सदस्य दीर्घ सोडारीको टोली बिपदले गरेको क्षेति, प्रदेश सकारकाद्धारा सञ्चालित विकास निर्माण योजनाहरुको अनुगमन निरीक्षणका लागि दार्चुला आइपुगेको हो ।