मालिकार्जुनका पहिरो पीडितलाई राहत सामग्री वितरण

दार्चुला ।  दार्चुला  जिल्लाको मालिकार्जुन गाउँपालिका वडा नम्बर ६ र ७ का पहिरो पीडित परिवारलाई राहत सामाग्री वितरण गरिएको छ ।

आइतवार नेपाल रेडक्रस सोसाइटी शाखा दार्चुलाले वडा नम्बर ६ का सलेती, भोल्यानी र वडा नम्बर ७ रतकोटका पहिरो पीडित १० घर परिवारलाई राहत वितरण गरेको हो । वडा नम्बर ७ का ४ परिवार र वडा नम्बर ६ का ६ घर परिवारलाई राहत सामाग्री वितरण गरिएको नेपाल रेडत्रस सोसाइटी दार्चुला शाखाका मंत्री दिपक प्रसाद अवस्थीले जानकारी दिए ।

सामाग्रीमा एक थान त्रिपाल, दुई थान धोती, एक थान कम्बल, एक सेट भाँडाकुडा र १५ मिटर कपडा वितरण गरिएको उहाले बताए ।

राहत वितरण कार्यक्रममा गाउँपालिका अध्यक्ष नरेन्द्र सिंह धामीले महाकाली कोरीडोर अन्तर्गत रहेको दार्चुला तिंकर सडक निर्माणका क्रममा भएको क्षति र हुन सक्ने सम्भावित जोखिमका बारेमा आयोजना प्रमुख अच्युतविलास पन्तलाई जानकारी गराइएका छन् । साथै गाउँपालिकाको वडा नम्बर २ अम्पेडा, ज्युनडा र नाइलबस्तीका घरपरिवारलाई सुरक्षित स्थानमा स्थानान्तरणका लागि जिल्ला विपद व्यवस्थापन समितिलाई आग्रह गरेका छन् ।

राहत सामाग्री वितरणमा जिल्ला समन्वय समिति प्रमुख करबिर बहादुर कार्की, मालिकार्जुन गाउँपालिका अध्यक्ष नरेन्द्र सिंह धामी, प्रमुख जिल्ला अधिकारी एवं विपद व्यवस्थापन समितीका अध्यक्ष शरद कुमार पोखरेल, सशस्त्र प्रहरी बल नेपाल नम्बर ४४ गण हेडक्वाटरका गणपति नरेन्द्र बम, प्रहरी नायव उपरीक्षक पदम बहादुर विष्ट, राष्ट्रिय अनुसन्धानका डिएसपी प्रज्वल खड्का, तिंकर सडक आयोजनाका प्रमुख अच्युत विलास पन्त र नेपाल रेटक्रस सोसाइटी दार्चुला शाखाका मन्त्री दिपक प्रसाद अवस्थी लगायतको सहभागिता रहेको थियो ।