राष्ट्रिय अपाङ्ग महासंघ – नेपाल बागमती प्रदेशद्वारा दुई दिने अभिमुखिकरण कार्यक्रम सम्पन्न 

बागमती । राष्ट्रिय अपाङ्ग महासंघ – नेपाल बागमती प्रदेशले कोभिड-१९ महामारीको विषम परिस्थितिलाई मध्यनजर गर्दै भर्चुअल प्रविधिको माध्यमवाट ”गुणस्तरिय समावेशी शिक्षाका लागि स्रोत कक्षा तथा विशेष विद्यालयको भुमिका” विषयमा दुई दिने अभिमुखिकरण कार्यक्रम सम्पन्न  गरेको छ ।

बागमती प्रदेश भित्र रहेका विशेष विद्यालय , स्रोत कक्षा, दिवा सेवा केन्द्र लगायतका विद्यालयहरुका विद्यालय व्यवस्थापन समितिका अध्यक्ष सदस्य  स्रोत शिक्षक तथा सहयोगी (आया) कर्मचारीहरुको क्षमता विकासको लागि २ दिने अभिमुखिकरण कार्यक्रम संचालन गरिएको हो ।

कार्यक्रममा समावेशी शिक्षा अपाङ्गता अधिकार बिज्ञ साथमा तथा बौद्धिक अपाङ्गता अभिभावक संघका अध्यक्ष मुकुन्द दाहालले सहजकर्ताको रुपमा भुमिका निर्वाह गर्नु भएको थियो ।

कार्यक्रमको पहिलो दिन समावेशी शिक्षा, नेपालमा अपाङ्गता भएका बालबालिकाहरुका लागि शैक्षिक कार्यक्रमहरु, अपाङ्गता भएका बालबालिका र शिक्षाका सवालहरु, राष्ट्रिय तथा अन्तराष्ट्रिय नीतिगत ब्यवस्थाहरु तथा राष्ट्रिय शिक्षा नीति २०७६ को दफाहरुमा उल्लेखित विशेष शिक्षा, समावेशी शिक्षा , अनौपचारिक शिक्षा ,  निरन्तर शिक्षा , दुर शिक्षा तथा खुल्ला शिक्षा सञ्चालन सम्बन्धि ब्यवस्था जस्ता विषय वस्तुमा केन्द्रित भई सहजिकरण गरिएको थियो । 

त्यस्तै कार्यक्रमको दोस्रो दिन विद्यालयहरुको पहुचँयूत्तताको अवस्था, शिक्षक सिप तथा समावेशी क्षमता, शिक्षण सामग्रीहरु, अपाङ्गता भएका बालबालिका र शैक्षिक कर्यक्रमहरुमा स्थानीय सरकारको भूमिका, शिक्षा नीति २०७६ को संरचना, शिक्षा नीति २०७६ र अपाङ्गता भएका विद्यार्थी, गुणस्तरीय समावेशी शिक्षाका लागि श्रोत कक्षा तथा बिशेष बिद्यालयका सम्भावित पाईलाहरु के के हुन सक्छ भन्ने विषय वस्तुमा केन्द्रित भई सहजिकरण भएको थियो ।

कार्यक्रममा स्रोत शिक्षक तथा आयाहरु, राष्ट्रिय  अपाङ्ग महासंघ नेपाल बागमती प्रदेशका अध्यक्ष, उपाध्यक्ष लगायत कर्मचारीहरु सहित ४० जनाको  उल्लेखनिय रुपमा सहभागी रहेको थियो ।