दार्चुला । जिल्ला प्रशासन कार्यालय दार्चुलाले अब देखी बारका आधारमा सेवा प्रवाह गर्ने जनाएको छ ।कोरोना भाईरस संक्रमण फैलिन नदिन प्रशासनले कार्यालयबाट बारका आधारमा सेवा प्रवाह गर्नेबारे आज सुचना जारी गरेको छ । प्रशासनले सुचना जारी गर्दै जिल्लाका नौ वटै स्थानिय तहका सेवाग्राहीलाई अलग अलग बार तोकेर सेवा दिने जनाएको छ ।
सरकारले लकडाउन खुलेको घोषणा गरे संगै कार्यालयमा सेवाग्राहीको भिडभाड बढ्दा कोरोना संक्रमणको डर हुने भन्दै सेवाग्राहीको भिडभाड कमगरी संक्रमण फैलिन नदिन प्रशासनले यस्तो योजना बनाएको हो । सेवाग्राहीले सेवा लिन आउदा मास्क, सेनिटाइजर, अनिवार्य रुपमा प्रयोग गरेर मात्रै कार्यालय भित्र प्रवेश गर्न भनेको छ । सेवाग्राही कार्यालय भित्र पसीसके पछि कार्यालयले तोकेको ठाउँमा बस्नु पर्ने तथा कम्तीमा पनि दुई मिटरको भौतिक दुरी कायम गर्नु पर्ने जनाएको छ ।
जिल्ला प्रशासन कार्यालयले आइतबार र सोमबारमा महाकाली नगरपालिका, दुहुँ र ब्याँस गाउँपालिकाका सेवाग्राहीलाई सेवा दिने सुचना मार्फत जनाएको छ । यस्तै मंगलबार र बुधबारमा शैल्यशिखर नगरपालिका, मालिकार्जुन र लेकम गाउँपालिकाका सेवाग्राहीलाई र बिहीबार र शुक्रबार अपिहिमाल, मार्मा र नौगाड गाउँपालिकाका सेवाग्राहीलाई सेवा प्रदान गर्ने गरी सुचना जारी गरेको छ । प्रशासनले साउन २५ गते आइतबादेखि बारका आधारमा सम्बन्धित स्थानिय तहका सेवाग्राहीलाई सेवा दिने जनाइएको छ ।
तपाईको प्रतिक्रिया