सोह्रश्राद्ध ‘भर्चुअल’ माध्यमबाट गराउन आग्रह, कसैलाई पनि निमन्त्रणा नगर्न अनुरोध

रूपन्देही ।  रूपन्देहीको तिलोत्तमा नगरपालिकाले सोह्रश्राद्धमा प्रविधिको प्रयोग गरेर संस्कार चलाउन नगरवासीलाई आग्रह गरेको छ ।

नगरपालिकाले शुक्रबार जारी गरेको सूचनामा सोह्रश्राद्ध, न्वारन, व्रतबन्ध, मृत्यु संस्कारलगायतमा पारिवारिक तथा सामूहिक जमघटजस्ता क्रियाकलाप नगर्न र सहभागी न्यून गराउन पनि भनिएको छ ।

कोरोना संक्रमितको संख्या बढ्दै गएपछि श्राद्धका लागि एक जना पुरोहित धेरै स्थान र व्यक्तिको घरमा पुग्नुपर्ने भएकाले संक्रमण फैलिन सक्ने जोखिम रहने हुनाले  गुरु, पुरोहित (पण्डित)  प्रविधिकै माध्यमबाट श्राद्ध गर्न अनुरोध गरिएको छ ।

आश्विन कृष्णपक्षमा गरिने महालय श्राद्ध (पितृ पुजन) अर्थात् सोह्रश्राद्ध भदौ १७ गतेबाट सुरु हुँदै छ । श्राद्धलाई ‘भर्चुअल’ माध्यमबाट गर्न/गराउन पुरोहित तथा यजमानहरूसँग आग्रह गर्दै यसका लागि समयमै छलफल र परामर्श गर्न पनि नगरपालिकाले सुझाएको छ । श्राद्धमा छिमेकी, इष्टमित्र, बन्धुबान्धव, आफन्तलाई निमन्त्रणा नगर्न पनि नगरले अनुरोध गरेको छ ।

‘महामारीको समयमा पनि परम्परागत संस्कार, संस्कृति, धर्म, पूजाअर्चनाजस्ता कार्यलाई निरन्तरता र जगेर्ना गर्नु हामी सबैको कर्तव्य हो,’ उनले भने, ‘सोह्रश्राद्ध तोकिएकै तिथिमा गर्नुपर्ने भएकाले महामारीको समयमा वैकल्पिक विधि अपनाई समयमै कार्य सम्पन्न गर्न गुरु, पुरोहित र यजमानहरूले पक्कै परामर्श गर्नुहुनेछ ।’

 नगरपालिकाले सोह्रश्राद्धमा प्रविधिको प्रयोग गरेर संस्कार चलाउन नगरवासीलाई आग्रह गरेपछि पुरोहितहरुले विरोध जनाएका छन् ।