रातो मछिन्द्रनाथको रथ तान्न थालेपछि युवाहरु र प्रहरीबीच झडप

काठमाडौं । कोरोना महामारीकाबीच रातो मछिन्द्रनाथको रथ तानिएको छ ।

रातो मछिन्द्रनाथको रथ तानेपछि ललितपुरको पुल्चोकमा प्रहरी र युवाहरुबीच झडप भएको छ ।

बिहीबार बिहान ठूलो संख्यामा जम्मा भएका युवाहरुले सरोकारवाला निकायसँग समन्वय नगरिकनै रथ तान्न थालेपछि प्रहरीले रोकेको थियो । त्यसक्रममा प्रहरीले पानीको फोहोरा हान्न थालेपछि झडप भएको हो ।

युवाहरुले पनि प्रहरीमाथि ढुंगामुढा गरेका छन् ।

स्थितिलाई नियन्त्रणमा लिन प्रहरीले केही अश्रुग्यास हानेको छ । अहिले अवस्था तनाव रहेको छ ।

काठमाडौं उपत्यकामा भदौ ३ गतेबाट लागू गरिएको निषेधाज्ञा बढाउँदै २४ गतेसम्म पुर्याइएको छ । सरकारले यो अवधिमा कुनै पनि मेला, महोत्सव, जात्रा सञ्चालन गर्न, मानिसहरु भेला/जम्मा हुन, भिडभाड गर्न, सभा, जुलुशलगायत कार्य गर्न निषेध गरिएको छ ।

पछिल्लो समय उपत्यकालगायत देशभर कोरोना संक्रमण बढ्दो क्रममा छ ।

यस्तो अवस्थामा ठूलो संख्यामा भेला भएर रथयात्रा गर्दा कोरोनाको उच्च जोखिम बढेको छ । यसबारे गुठी संस्थानले कुनै निर्णय गरेको छ न त सरोकारवाला निकायलाई नै यसबारे जानकारी छ ।