आज दिउँसो ४ बजे रातो मत्स्येन्द्रनाथको रथ तानिने

काठमाडौं । रातो मत्स्येन्द्रनाथको रथ आज तानिने भएको छ।

आज दिउँसो ४ बजे रथ हाल रहेको स्थान पुल्चोकबाट अलि पर सोह्रखुट्टे पाटीसम्म तानिने भएको हो  ।

कोरोना भाइरसबाट जोगिन विश्व श्वास्थ्य संगठनको निर्देशनको पालना गरी एकआपसमा दूरी कायम गरी आइतबार दिउँसो रथ तानिने ज्यापु समाजका अध्यक्ष चन्द्र महर्जनले जनाए ।

उनका अनुसार रथ यात्रामा गा:बहाल, सुन्धारा, लगनखेल र जावलाखेलका पालो खलकबाट एउटा/एउटा धिमे बाजा र समिति जनशक्ति बसेर यात्रा गरिनेछ ।

ललितपुरको पुल्चोकमा रहेको रथलाई तानेर करीब ३० मिटर टाढा पुर्‍याइने छ। रथ तान्नका लागि १२० जना जम्मा हुने ज्यापू समाजले जनाएको छ। उनीहरु आफ्नो बेग्लै पहिरनसहित रथ तान्ने काममा सहभागी हुनेछन्।

स्थानीयवासीलाई भने कोरोनाका कारण जात्रामा सहभागी नहुन ज्यापु समाजले अनुरोध गरेको छ। यसपटक रथलाई पाटन शहर पूरै घुमाइने छैन।

सोमबार भुज्या मनाइने तथा मूर्तिलाई बुङ्गमती लैजान साइत हेरिनेछ।

साइत जुरेमा भदौ २६ गते रातो मत्स्येन्द्रनाथलाई बुङ्गमती लगिनेछ। त्यसपछि रातो मत्स्येन्द्रनाथको जात्रा सम्पन्न हुनेछ।