डुबेर ३ जनाको मृत्यु, एकजनाको सकुशल उद्दार

काठमाडौं । कैलाली, जोशीपुर गाउँपालिका-२ बस्ने ६० बर्षीय पर्शुराम कुस्मीको सोही ठाउँस्थित घैला नालामा डुबेर सोमबार मृत्यु भएको छ । उक्त स्थानमा घर पोत्ने माटो निकाल्ने क्रममा चिप्लिएर नालामा डुबी अशक्त भएका उनको स्थानीयले उद्दार गरी उपचारको लागि प्राथमिक स्वास्थ्य केन्द्र जोशीपुर लैजाने क्रममा बाटोमै मृत्यु भएको हो ।
कञ्चनपुर, लालझाडी गाउँपालिका-२ कन्ज बस्ने कालु रानाकी १४ वर्षीया छोरी निष्ठा राना र सोही ठाउँ बस्ने उत्तम रानाकी १५ वर्षीया छोरी मोनिका रानाको सोही ठाउँस्थित दोदा नदीमा डुबेर सोमबार मृत्यु भएको छ । उनीहरु समेत सोही ठाउँ बस्ने देबदत्त रानाकी १२ वर्षीया छोरी अन्नु राना उक्त नदीमा माछा मार्ने क्रममा डुबेकोमा स्थानीयले अन्नुलाई सकुसल उद्धार गरेका थिए भने निष्ठा र मोनिका बेपत्ता भएका थिए । ईलाका प्रहरी कार्यालय बेलौरीबाट तत्काल खटिएको प्रहरीले खोजी गर्ने क्रममा बेपत्ता भएका दुवै जनाको शव फेला परेको हो । अन्नु रानालाई उपचारको लागि प्रादेशिक अस्पताल धनगढी लगिएको छ ।