दार्चुला । आगामी असोजमा हुने नवौँ राष्ट्रिय खेलकुद प्रतियोगितामा दार्चुलाबाट सहभागी हुने खेलाडीका लागि आवेदन खुल्ला गरिएको छ । उक्त प्रतियोगितामा सहभागी हुन चाहने इच्छुक महिला र पुरुष खेलाडीका लागि आवेदन खुल्ला गरिएको हो ।
उक्त प्रतियोगिताको लागि जिल्लास्तरीय प्रतियोगिता तथा प्रदेशस्तरीय छनोटका लागि खेलाडीको आवेदन खुल्ला गरिएको दार्चुला जिल्ला खेलकुद समितिका कोषाध्यक्ष धिरज सिंह बिष्टले जानकारी दिए । सहभागी हुन चाहने खेलाडीले उक्त प्रतियोगिता सञ्चालन निर्देशिका २०७९ को अनुसूची १ बमोजिम दर्ता फारम भर्नुपर्नेे छ ।
फारम भरेर यही साउन ३१ गतेभित्र जिल्ला खेलकुद समितिमा दर्ता गराउनुपर्नेछ । उक्त प्रतियोगिताका लागि विभिन्न १६ खेलका खेलाडी छनोट गरिनेछ । जसमा एथ्लेटिक्स,फुलकन्ट्याक्ट कराते, भलिबल, क्रिक्रेट, कवड्डी, टेबलटेनिस, कराँते, तेक्वान्दो, बक्सिङ, बुद्धिचाल, ह्याण्डवल, वास्केटवल, खोखो, उसु र फुटबल रहेका छन् ।
जिल्लास्तरीय छनोट प्रतियोगिता आगामी भदौमा हुने जनाइएको छ । राष्ट्रिय खेलकुद परिषद्को आयोजनामा नवौँ राष्ट्रिय खेलकुद प्रतियोगिता आगामी असोज २८ देखि कात्तिक ३ गतेसम्म गण्डकी प्रदेशको पोखरामा हुने तय भएको छ । खेलाडीले साउन ३१ गते सम्म फारम भरिसक्नु पर्ने सुचनामा उल्लेख गरिएको छ ।
तपाईको प्रतिक्रिया