कोहलपुर, कार्तिक २७,
विद्यार्थीहरूको शैक्षिक गतिविधिसँगै मानसिक, शारीरिक तथा व्यक्तित्व विकासलाई प्रोत्साहन गर्ने उद्देश्यका साथ कोहलपुर सिटी एकेडेमी, कोहलपुर बाँकेमा वार्षिक anual sports premier प्रतियोगिता भव्य रूपमा सुरु भएको छ ।
कार्यक्रमको उद्घाटन बिहीबार कोहलपुर नगरपालिकाका नगर शिक्षा शाखाका प्रमुख रविलाल मिजारले गरेका थिए । उद्घाटन समारोहमा बोल्दै मिजारले भने,–‘खेलकुद केवल मनोरञ्जनका लागि होइन, यो जीवनको अनुशासन, आत्मविश्वास र नेतृत्व क्षमता सिकाउने माध्यम हो। विद्यार्थीहरूलाई खेलकुदले परिश्रम गर्न, हारजीत स्वीकार्न र भावना विकास गर्न मद्दत गर्छ। यसले भविष्यमा उनीहरूलाई सक्षम, जिम्मेवार र आत्मनिर्भर नागरिक बन्न सहयोग पु¥याउँछ ।’
उद्घाटन समारोहमा विद्यालयका संस्थापक प्रिन्सिपल प्रशान्त रिजाल, विद्यालयका शिक्षक शिक्षिका, विद्यार्थीहरूको उल्लेखनीय उपस्थिति रहेको थियो । कार्यक्रममा विद्यार्थीहरूले आकर्षक मार्चपास र सांस्कृतिक प्रस्तुतिहरू पनि गरेका थिए, जसले कार्यक्रमलाई उत्साहपूर्ण बनाएको थियो । तीन दिनसम्म सञ्चालन हुने यस खेलकुद प्रतियोगितामा कक्षा ४ देखि ९ सम्मका विद्यार्थीहरूका लागि १०० मिटर दौड, २०० मिटर दौड, शटफुट, ज्याब्लिङ थ्रो, लङ्ग जम्प, ट्रिपल जम्प, हाइ जम्प र रिले दौड लगायतका प्रतिस्पर्धाहरू हुनेछन् । साथै, छात्रा–छात्र दुवैका लागि भलिबल, कबड्डी जस्ता टोलीगत खेलहरू पनि आयोजना गरिएको छ ।
त्यसैगरी कक्षा नर्सरीदेखि कक्षा ३ सम्मका बालबालिकाहरूका लागि कुर्ची दौड, चकलेट दौड लगायत रमाइलो खेलहरू समावेश गरिएको छ, जसले साना विद्यार्थीहरूको आत्मविश्वास र खेलप्रतिको रुचि बढाउने उद्देश्य राखेको विद्यालयले जनाएको छ । विद्यालयका प्रिन्सिपल प्रशान्त रिजालले शिक्षणसँगै खेलकुदमा सहभागी विद्यार्थीहरूमा नेतृत्व, सहकार्य र आत्मअनुशासनको गुण विकास हुने बताए । उनले आगामी वर्षहरूमा यस प्रतियोगितालाई अझ व्यवस्थित र अन्तरविद्यालय स्तरमा विस्तार गर्ने योजना रहेको बताए । तीन दिनसम्म चल्ने यो कार्यक्रमले विद्यालयको खेलकुद संस्कृति र विद्यार्थीहरूको समग्र विकासमा नयाँ ऊर्जा भर्ने विश्वास लिइएको छ ।
उद्घाटनमा आज विभिन्न खेलहरू भएका थिए। १०० मिटर दौड छात्र छात्रा, २०० मिटर दौड छात्र छात्रा, सटफुट लगायत साना बालबालिकाहरूका लागि विभिन्न खेलविधामा प्रतिस्पर्धा भएको थियो । प्रतियोगीतामा फिल्ड मार्सल रमेश शाही ठकुरी, प्रशिक्षक लोकेन्द्रबहादुर चन्द, सुशील कुमार खत्री, रोहित कुमार खत्री, खेल संयोजक आभाष विक्रम क्षेत्रीले सहजिकरण गरिरहेका छन् ।
