कोहलपुर, फागुन ११,
बाँके कोहलपुर नगरपालिकामा निशुल्क आँखा शिविर भैरहेको छ ।
गएको शुक्रबार फागुन ९ गतेदेखि कोहलपुर नगरपालिकाका विभिन्न वडाहरुमा निशुल्क आँखा शिविर संचालन भैरहेको छ । कोहलपुर नगरपालिका वडा नम्बर १ देखि १५ सम्मकै वडाहरुमा कोहलपुर नगरपालिकाको आयोजना तथा नगर स्वास्थ्य शाखाको सहकार्यमा आँखा शिविर संचालन भैरहेको हो । नगरपालिकामा सप्ताहव्यापी निःशुल्क आँखा शिविर संचालन भैरहेको नगर स्वास्थ्य शाखा प्रमुख अनिल सेन ठकुरीले जानकारी दिए ।
‘हाम्रो कर्तव्य हाम्रो जिम्मेवारी, आँखा सेवामा हाम्रो साझेदारी’ भन्ने मूल नारासहित तिलगंगा आँखा अस्पतालसँगको समन्वयमा सुरु भएको आँखा शिविर फागुन १८ गतेसम्म सञ्चालन हुनेछ । शिविर शुक्रबारदेखि कोहलपुर–१४ स्थित राम माध्यमिक विद्यालयबाट सुरु भएको हो । शिविरको कोहलपुर नगरपालिकाका नगर प्रमुख पूर्णप्रसाद आचार्यले उद्घाटन गरेका हुन् । शनिबार कोहलपुर नगरपालिका वडा नम्बर ४ मा पनि आँखा शिविरमार्फत् त्यहाँका स्थानीय नागरिकहरुका आँखा जाँच गरिएको हो । वडा नम्बर ४ मा नगरपालिकाका सामाजिक विकास शाखा प्रमुख ईश्वरी बि.के.ले शिविरको उद्घाटन गरेका हुन् ।
उनले आँखा शिविरले कोहलपुरका नागरिकलाई राहत पुुग्ने बताए । संयोजक बि.क.ले उनले सम्पूर्ण नागरिकलाई शिविरमा गएर आँखा चेकजाँच गर्न आग्रह गरे । कार्यक्रममा कोहलपुर नगरपालिका वडा नम्बर ४ का वडाध्यक्ष मुबारक अली गुजर लगायतको सहभागिता रहेको थियो । शिविर कोहलपुरमा १५ वटै वडामा सञ्चालन हुनेछ । शुक्रबार पहिलो दिन सुरु भएको शिविरमा बालबालिकादेखि युवा र जेष्ठ नागरिकहरूको उल्लेख्य सहभागिता रहेको थियो ।
यसैगरी स्क्रिनिङको क्रममा आँखा सम्बन्धी गम्भीर समस्या देखिएकाहरूको निःशुल्क शल्यक्रियासमेत गरिनेछ । शिविर ज्येष्ठ नागरिकलाई लक्षित गर्दै बालबालिका तथा अन्य उमेर समूहका नागरिकहरूले समेत सेवा पाउँनेछन् । आँखा जाँच र अपे्रसन निःशुल्क गरिनेछ । शल्यक्रिया गर्नुपर्ने बिरामीहरूको कोहलपुर नगर अस्पतालमा फागुन १६, १७ र १८ गते निःशुल्क शल्यक्रिया गरिने छ । शल्यक्रिया गर्नुपर्ने कोहलपुर नगरभित्रका बिरामीलाई खाजा खर्चसहित घरसम्म पु¥याउने व्यवस्था गरिएको छ ।
शिविरका लागि तिलगंगा आँखा अस्पतालका दुईजना र सुर्खेेत आँखा अस्पताल सुर्खेतबाट दुईजना विशेषज्ञ आएका छन् । शिविरमा आँखा जाँच, ओपिडी सेवा, मोतिविन्दुको जाँच, औषधी वितरण तथा शल्यक्रियाका लागि व्यक्ति छनोट गरिनेछ । आँखा शिविर आईतबार कोहलपुर नगरपालिका वडा नम्बर २ सालकोबुटामा संचालन हुनेछ ।
