कोहलपुर, असोज २३,
नेपाल विद्युत् प्राधिकरण, कोहलपुर वितरण केन्द्रले बाँकेको राप्ती सोनारी गाउँपालिका–९ स्थित श्री गणेश माध्यमिक विद्यालयमा विद्युतीय सुरक्षा तथा सचेतना कार्यक्रम सम्पन्न गरेको छ ।
शुक्रबार आयोजित एकदिने कार्यक्रममा कक्षा ९ का करिब ५० जना विद्यार्थी तथा शिक्षक–शिक्षिकाको सहभागिता रहेको थियो । कार्यक्रममा बिद्युत्को सुरक्षित प्रयोग, बिद्युत् दुर्घटना न्यूनीकरण, बिद्युत् चुहावट नियन्त्रण तथा बिद्युत महसुलको अनलाइन भुक्तानीलगायतका विषयमा जानकारी प्रदान गरिएको कोहलपुर वितरण केन्द्रका प्रशासन प्रमुख मनोज जि.सीले जानकारी दिए ।
बिद्युत्को प्रयोग गर्दा अपनाउनुपर्ने सावधानीबारे विद्यार्थी तथा शिक्षकहरूलाई सचेत गराउने र विद्युत् दुर्घटनाबाट हुने जोखिम न्यूनीकरण गर्ने उद्देश्यले कार्यक्रम आयोजना गरिएको हो । कार्यक्रममार्फत बिद्युत्को सुरक्षित प्रयोगसम्बन्धी ज्ञान अभिवृद्धि गर्नुका साथै अनलाइन माध्यमबाट विद्युत् महसुल भुक्तानी गर्ने प्रक्रियाबारे समेत जानकारी आदानप्रदान गरिएको थियो ।
यसैगरि बिहीबार कोहलपुर नगरपालिका–२ स्थित श्री शिवशक्ति माध्यमिक विद्यालयमा कार्यक्रम गरिएको थियो । यसभन्दा अघि पनि विभिन्न विद्यालयमा कार्यक्रम गरि सकिएको कार्यालय प्रमुख रमेश अवस्थीले जानकारी दिए । कार्यक्रम सफल बनाउन समन्वय तथा सहयोग गर्ने विद्यालय परिवार र सहभागी सबैप्रति कोहलपुर वितरण केन्द्रले धन्यवाद व्यक्त गरेको छ ।
