कोहलपुर, बैशाख २०,
बाँकेको कोहलपुरमा जारी चौथो संस्करणको कोहलपुर गोल्डकप फुटबल प्रतियोगिता उत्साहजनक माहोलबीच अगाडि बढिरहँदा मौसमले भने खेलाडी र दर्शक दुवैलाई निराश बनाएको छ। दोस्रो दिनको खेलका लागि मैदानमा दर्शकहरूको उल्लेखनीय उपस्थिति थियो । स्थानीयदेखि बाहिरका फुटबलप्रेमीहरू खेल हेर्न ठूलो संख्यामा उपस्थित भएका थिए । खेल सुरु भएदेखि नै मैदानमा उत्साह, समर्थन र प्रतिस्पर्धाको रोमाञ्चक वातावरण देखिन्थ्यो । जस्ट जोन एफसी नाइजेरिया र रोयल फुटबल क्लब कर्णाली बीचको प्रतिस्पर्धा निकै रोचक बन्दै गएको थियो ।
तर खेल ३७औँ मिनेटमा पुग्दा एक्कासी हावाहुरीसँगै वर्षा सुरु भयो । मौसम बिग्रँदै गएपछि खेल निरन्तर सञ्चालन गर्न कठिन भएपछि आयोजकले खेल स्थगित गर्ने निर्णय लिन बाध्य भयो । स्थगनअघि नाइजेरियाली टोलीले एक गोल गर्दै अग्रता बनाइसकेको थियो, जसले खेल अझ रोमाञ्चक मोडमा प्रवेश गरिरहेको संकेत दिएको थियो ।
मौसमले साथ दिएको भए यो खेल निकै रोमाञ्चक र स्मरणीय हुने अपेक्षा गरिएको थियो । मैदानमा उपस्थित दर्शकहरूको ऊर्जा र खेलाडीहरूको प्रदर्शनले त्यो संकेत पनि दिएको थियो । तर अचानक परेको वर्षाले त्यो सम्भावनालाई केही समयका लागि रोकिदिएको छ। खेल अवलोकन गर्न दर्शकहरूको उल्लेखनीय उपस्थिति रहेको थियो, जहाँ हजारौंको संख्यामा फुटबलप्रेमीहरू मैदानमा उपस्थित थिए।
प्रतियोगिता संयोजक कर्णबहादुर बस्नेतका अनुसार स्थगित खेल भोलि बिहान ८ बजेबाट पुनः सञ्चालन गरिनेछ । दर्शक र खेलाडीहरू फेरि त्यही उत्साहका साथ मैदानमा फर्किने अपेक्षा गरिएको छ । कोहलपुर गोल्डकपले खेलसँगै पर्यटन प्रवर्द्धनमा समेत योगदान पुर्याउने लक्ष्य राखेको छ ।
मौसमको अवरोधका बाबजुद प्रतियोगिताप्रति दर्शकहरूको उत्साह भने घटेको छैन । अब सबैको ध्यान भोलिको खेलतर्फ केन्द्रित भएको छ, जहाँ अधुरो खेलले पुनः जीवन पाउनेछ र मैदानमा फेरि रोमाञ्चकता फर्किनेछ ।
तस्बिर : संजय मण्डल
